Administrata e Bidenit zbulon paketën e radhës prej 500 mln dollarësh për Ukrainën

Sekretari amerikan i Mbrojtjes në largim Lloyd Austin bëri të ditur se SHBA do të ofrojë  një paketë ndihme prej 500 milionë dollarësh për Ukrainën, duke përfshirë raketa të mbrojtjes ajrore, municione dhe pajisje për avionët luftarakë F-16.

Paketa u zbulua në samitin Ramstein në Gjermani, ku kjo paketë pritet të jetë kësti i fundit i mbrojtjes së SHBA-së i dhënë nga administrata Biden përpara se Donald Trump të marrë detyrën më 20 janar.

Rikthimi i Donald Trumpit në Shtëpinë e Bardhë ka shkaktuar shqetësim për të ardhmen e mbështetjes së SHBA-së për Ukrainën, pasi presidenti i zgjedhur shpesh ka kritikuar ndihmën e administratës Biden për Kievin.

Ndryshimet e ardhshme të lidershipit të SHBA-së kanë hedhur gjithashtu dyshime mbi të ardhmen e Grupit të Kontaktit të Mbrojtjes së Ukrainës të formatit Ramstein, një koalicion prej 57 vendesh që ka koordinuar ndihmën për Ukrainën që nga prilli 2022.

/rtsh.al/