Afganistan: Vriten 3 policë e plagosen të paktën 5 të tjerë

Zyrtarët afganë thanë se shpërthimi i një bombe, e fshehur në një karocë druri shkaktoi vrasjen e 3 policëve dhe plagosjen e të paktën 5 të tjerëve në qytetin jugor të Kandaharit.

Zyrtarët lokalë thanë se sulmi sot kishte në shënjestër një automjet të policisë. Të paktën edhe 6 civilë u plagosën.

Agjencia franceze e lajmeve njoftoi se talebanët morën përgjegjësinë për sulmin.

Shpërthimi i sotëm është i dytë në dy ditë në Kandahar. Dje, zyrtarët kanadezë thanë se 3 ushtarë kanadezë u vranë kur një bombë në anë të rrugës shpërtheu afër makinës së tyre.

Po dje, kryeministri britanik Gordon Braun u bëri thirrje aleatëve të NATO-s të bëjnë më shumë për të përballuar barrën e luftimeve kundër kryengritësve talebanë në Afganistan.

Zoti Braun tha se Britania dhe Shtetet e Bashkuara nuk duhet të jenë të vetmet vende që kontribuojnë me trupa shtesë për të ndalur dhunën në rritje. Ai i bëri komentet dje gjatë një vizite të panjoftuar në Afganistan, ku u takua me Presidentin afgan Hamid Karzai.

Zyrtarët ushtarakë amerikanë thonë se do të dërgojnë mijëra trupa shtesë në vend.

Kryeministri britanik Gordon Braun tha se do të shqyrtonte mundësinë e përforcimit të forcës aktuale britanike prej 8 mijë trupash që ndodhet në Afganistan.     (ze)