Aksident zinxhir në autostradën në Zvicër, shtatë të plagosur

Shtatë persona kanë mbetur të lënduar si pasojë e një aksidenti zinxhir ku u përfshinë katër automjete, në autostradën A12, pranë Matranit, në kantonin e Freiburgut të Zvicrës. Drejtuesi i automjetit që dyshohet se shkaktoi përplasjen është larguar pa pritur policinë, ndërsa identiteti i tij ende nuk dihet.

Ngjarja ndodhi të hënën, rreth orës 16:30, në segmentin e autostradës mes Matranit dhe daljes Fribourg-Sud, në drejtim të Bernës. Sipas policisë kantonale, një automjet u fut në autostradë përmes korsisë së emergjencës, duke shkaktuar një zinxhir përplasjesh mes katër veturave, raporton Blick.

Nga aksidenti, shtatë persona pësuan lëndime dhe u dërguan me autoambulanca në spitalet përkatëse, ku morën trajtimin e nevojshëm mjekësor.

Informacionet fillestare të policisë bëjnë të ditur se drejtuesi i automjetit të parë nuk qëndroi në vendin e aksidentit, por vazhdoi lëvizjen. Autoritetet ende nuk kanë arritur ta identifikojnë atë dhe po punojnë për të sqaruar plotësisht rrethanat e ngjarjes.

Përplasja shkaktoi ndërprerjen e plotë të qarkullimit në këtë pjesë të A12, pasi automjetet e dëmtuara mbetën të bllokuara në korsi.

Përpjekjet e ekipeve të shpëtimit u vështirësuan edhe nga mungesa e një korridori emergjence, i cili duhet të krijohet nga drejtuesit e automjeteve për t’u mundësuar mjeteve të emergjencës kalimin e shpejtë drejt vendit të aksidentit.

Autostrada qëndroi e mbyllur për afro tri orë, ndërsa ekipet e shpëtimit kryen ndërhyrjet e nevojshme, policia zhvilloi hetimet fillestare dhe automjetet e dëmtuara u larguan nga rruga.

Në vendngjarje morën pjesë edhe specialistët e Njësisë së Hetimit të Aksidenteve të Policisë Kantonale të Freiburgut. Ata po punojnë për të përcaktuar shkaqet e sakta të përplasjes dhe për të identifikuar shoferin që u largua.

Hetimet për zbardhjen e plotë të aksidentit vazhdojnë.