Akti Normativ- 2 miliardë lekë shtesë për bujqësinë, ministri Salla: Nga Skema Kombëtare përfitojnë 65 mijë fermerë, garantohet pagesa brenda vitit

Mbështetja financiare për bujqësinë shqiptare do të pësojë një rritje të ndjeshme përmes Aktit Normativ të fundvitit. Ministri i Bujqësisë dhe Zhvillimit Rural, Andis Salla, ka njoftuar sot se fondi për Skemën Kombëtare ka arritur shifrën rekord prej 6.4 miliardë lekësh.

Sipas ministrit Salla, qeveria ka alokuar 2 miliardë lekë shtesë me Akt Normativ, të cilat do të shkojnë drejtpërdrejt në llogaritë e fermerëve. Kjo lëvizje shënon një rritje prej 20.8% krahasuar me fondin e një viti më parë.

Synimi kryesor i kësaj injektimi financiar është amortizimi i kostove të prodhimit për fermerët, duke i bërë produktet “Made in Albania” më konkurruese në tregun vendas dhe atë të huaj.

“Me Aktin Normativ të fundvitit, mbështetja për fermerët përmes Skemës Kombëtare 2025 arrin në 6.4 miliardë lekë një rritje prej 20,8% krahasuar me një vit më parë, drejtpërdrejt në shërbim të fermerëve, për të ulur kostot dhe për të siguruar vijimësinë e prodhimeve “Made In Albania“, shkruan ministri në rrjetet sociale.

Nafta falas dhe përfituesit

Një nga zërat më të rëndësishëm të kësaj skeme mbetet subvencionimi i naftës.

Ministri bëri të ditur se deri më tani, nga Skema Kombëtare kanë përfituar 65,000 fermerë. Nga ky numër, 49,800 fermerë janë mbështetur me naftë falas (mbulim 100% i vlerës së taksave), një masë që lehtëson ndjeshëm punimin e tokës dhe mekanikën bujqësore.

Ministri Salla theksoi se Akti i ri Normativ garanton likuiditetin e nevojshëm.

“Akti Normativ garanton pagesën e plotë për çdo fermer të kualifikuar brenda vitit buxhetor, duke siguruar korrektësi dhe transparencë,” shkruan ministri.

SHIFRAT

•     6.4 miliardë lekë fondi total për Skemën Kombëtare.

•     +20.8% rritje krahasuar me vitin e kaluar.

•     2 miliardë lekë shtesa e miratuar me Akt Normativ.

•     65,000 numri total i përfituesve.

•     49,800 fermerë që kanë marrë naftë falas.

  /rtsh.al/