Aplikimi për panelet diellore, në nëntor-dhjetor përfituan 2000 persona! Qytetari nga Korça: Kam reduktuar faturën e energjisë

Për të kursyer sa më shumë energji elektrike dhe për të reduktuar faturën, konsumatorëve shqiptarë iu ofrua instalimi i paneleve diellore për ngrohjen e ujit me financim 70% nga buxheti i shtetit.

Ky plan i Ministrisë së Energjisë rezultoi me interes pasi aplikimet në fazën e parë ishin të konsiderueshme, ku interes të lartë për instalimin e tyre shfaqën edhe qytetarët nga Korça.

Njëri prej përfituesve, Ridvan Beko na shpjegon se pas aplikimit të kryer në e-Albania dhe plotësimit të kritereve të kërkuara, u shpall fitues dhe tashmë e ka në përdorim një panel diellor për ngrohjen e ujit.

Përdorimi i paneleve të tilla referuar banorëve që i përdorin prej vitesh, u ka reduktuar ndjeshëm konsumin e energjisë elektrike. Disa prej tyre thonë se kanë përgjysmim të faturës së energjisë ndërsa e vlerësojnë këtë nismë të Qeverisë si pozitive, pasi instalimi i një paneli ka kosto të konsiderueshme.

Sipas të dhënave, ngrohja e ujit zë rreth 20 % të konsumit të energjisë së një familje në një muaj. Në thirrjen e parë të Ministrisë së Energjisë në muajt nëntor-dhjetor përfituan 2 mijë qytetarë ndërsa pritet që këtë vit të çelet një thirrje e dytë për aplikime.

/rtsh.al/