Arratisja e Ndocit/ Gjykata jep masat për 8 të arrestuarit, vetëm 3 në “arrest me burg”

Gjykata e Durrësit dha këtë të shtunë, 17 janar, masat e sigurisë për tetë zyrtarët e arrestuar pas arratisjes së Altin Ndocit nga Spitali i Durrësit.

Kështu, tre prej të arrestuarve u lanë në arrest me burg, dy në arrest shtëpie, ndërsa tre të tjerët u lanë në masën detyrim paraqitje.

Ish-zv.shefi i Policisë së Burgut të Durrësit, Dezdemon Pazaj dhe 2 prej efektivëve që kanë shoqëruar Altin Ndocin ditën e arratisjes, do të qëndrojnë në burg. Ndërkohë Gjykata e Durrësit  vendosi të lirojë nga qelia 3 efektivët e tjerë të grupit të shoqërimit, Aranit Çela, Preng Marvataj dhe Dorjan Saraçi, për të cilët caktoi masën detyrim paraqitjeje.

5 efektivët shoqëruan pa pranga drejt spitalit të Durrësit 2 të paraburgosur, Ndocin dhe Gerald Kuqin, ndonëse sipas rregullores së Burgjeve për të shoqëruar një të paraburgosur duhen 3 efektivë në dispozicion, pra në ambulancën e burgjeve ditën e arratisjes së Ndocit do duhej të ishin në total 6 efektivë.

Në arrest shtëpie do të qëndrojë kryeinfermieri i burgut, i cili Aulon Çuko, i cili ishte personi që firmosi me urgjencë rekomandimin për dërgimin e Ndocit për vizitë në spitalin e Durrësit.

Togat e zeza vendosën masën arrest shtëpie edhe Violeta Ukën, punonjëse e policisë së burgjeve, personi që duhej të kishte njoftuar sallat operative për shoqërimin e Ndocit dhe të paraburgosurit tjetër drejt spitalit të Durrësit.