Australi, nga përmbytjet 75 viktima

Situata vazhdon të mbetet alarmante në Queensland të Australisë ku autoritetet njoftojnë se shirat e rrëmbyeshëm kanë provokuar dëme të mëdha materiale por ajo c'ka është më e rëndë, është fakti se numri i viktimave po shtohet. Deri tani besohet se kanë humbrur jetën 75 persona nga këto përmbytje dhe qindra të tjerë janë evakuar. Ndërkaq një valë e nxehtë ka përfshirë juglindjen e Australisë. Temperature rekord janë regjistruar në Melburn dhe Adelaide, vende ku janë regjistruar edhe viktimat. Por një rrezik i madh paraqitet për vendasit edhe nga krokodilët që kanë vërshuar rrugëve. Të paktën tre prej tyre janë parë në afërsi të Normanton-it. Megjithatë ka gjasa që banorët në tropikun verilindor të Australisë të mund t'i rikthehen normalitetit, pasi duket se reshjet kanë nisur të pakësohen pas disa ditësh rrebeshi te vazhdueshëm. 62 % e Queenslandit, shteti i dytë më i madh i Australisë, u godit nga kjo fatkeqësi natyrore. Autoritetet lokale deklaruan gjendjen e emergjencës pasi disa qytete janë praktikisht nën ujë, dhe shumë zona të tjera janë izoluar tërësisht. Disa nga banorët e këtyre zonave thonë se kurrë s'kishin parë përmbytje të tilla. Sezoni i reshjeve në Australi ka nisur që në dhjetor të vitit të kaluar. Banorët janë paralajmëruar të kenë kujdes jo vetëm nga krokodilët, por edhe nga gjarpërinjtë.