BE kërkon armëpushim në Gaza, liderët bien dakord edhe për përdorimin e aseteve ruse në ndihmë të Ukrainës
Krerët e shteteve dhe qeverive nga 27 anëtarët e BE-së u takuan në Bruksel për ditën e parë të samitit të tyre.Presidenti i Këshillit Europian Charles Michel deklaroi se unioni ra dakort për një deklaratë të unifikuar për Lindjen e Mesme, për të frenuar katastrofën humanitare.
“BE bën thirrje për një pauzë të menjëhershme humanitare që çon në një armëpushim të qëndrueshëm. Qasja e plotë dhe e sigurt humanitare në Gaza është thelbësore për t’i ofruar popullatës civile ndihmë për shpëtimin e jetës në një situatë katastrofike në Gaza”, tha Michel.
Ndërkohë presidentja e Komisionit Europian Ursula von der Leyen tha se BE ra dakort per perdorimin e te ardhurave nga asetet ruse per të ndihmuar Ukrainën.
“Kjo nuk është ende një marrëveshje përfundimtare, por 27 vendet e BE-së rane dakort për përdorimin e të ardhurave nga asetet e ngrira ruse. Këto burime do të na lejojnë të kemi tre miliardë euro këtë vit, të cilat mund të shpenzohen për blerjen e pajisjeve ushtarake që do të dërgohen në Kiev. Nëse propozimi finalizohet 1 miliard eurot e para mund te transferohen më 1 korrik”, tha Von der Leyen.
Samiti i liderëve evropianë vjen në një kohë kur Kievi është gjithnjë e më i shqetësuar për qëndrueshmërinë e mbështetjes ushtarake amerikane. /vizionplus.tv