BE vendos raundin e katërt të sanksioneve ndaj Rusisë që synojnë oligarkët dhe politikanët
Bashkimi Evropian ka miratuar një raund të katërt të sanksioneve kundër Rusisë për pushtimin e saj në Ukrainë, që përfshin 160 oligarkë të tjerë, politikanë rusë dhe tre banka bjelloruse, tha të mërkurën Presidentja e Komisionit Evropian Ursula von der Leyen raporton CNN.
“Ne po forcojmë më tej rrjetën e sanksioneve në përgjigje të agresionit ushtarak të Rusisë kundër Ukrainës”, shkroi von der Leyen në Twitter.
Presidenca franceze e Këshillit të Bashkimit Evropian tha gjithashtu në Twitter se ambasadorët e BE-së kishin miratuar “sanksione të reja që synojnë liderët dhe oligarkët rusë dhe anëtarët e familjeve të tyre të implikuar në agresionin rus kundër Ukrainës”.
“Në veçanti masat e synuara të miratuara përjashtojnë tre banka bjelloruse nga sistemi SWIFT. Ato sqarojnë çështjen e kriptomonedhave dhe i shtohen listës së mallrave dhe materialeve që nuk mund të eksportohen,” vazhdoi presidenca franceze.
Detaje të mëtejshme do të përcaktohen në Gazetën Zyrtare të Bashkimit Evropian më vonë të mërkurën.
/rtsh.al/