BERLIN – Habeck: Operacioni izraelit në Rafah është i paligjshëm

BERLIN, 25 maj /ATSH-ANSA/ – Ministri gjerman i Ekonomisë Robert Habeck kritikoi veprimet e Izraelit në Gaza, duke e përshkruar operacionin ushtarak në Rafah si në kundërshtim me ligjin ndërkombëtar.

“Uria, vuajtjet e popullsisë palestineze dhe sulmet në Rripin e Gazës janë të papajtueshme me ligjin ndërkombëtar,” tha Habeck në Berlin, duke iu referuar një vendimi të Gjykatës Ndërkombëtare të Drejtësisë (ICJ), duke i bërë thirrje Izraelit të përfundojë ofensivën e tij në Rafah.

Habeck tha se qeveria gjermane beson “se Izraeli nuk duhet ta kryejë këtë sulm, të paktën jo në mënyrën që bëri më parë në Rripin e Gazës, duke bombarduar kampet e refugjatëve e kështu me radhë”.

Kancelari gjerman Olaf Scholz gjithashtu përsëriti paralajmërimet kundër një ofensive ushtarake izraelite në shkallë të gjerë në qytetin jugor të Gazës, Rafah.

“Pretendimi ynë është se lufta duhet të zhvillohet gjithmonë në atë mënyrë që të respektojë rregullat e së drejtës ndërkombëtare”, tha Scholz.

“Kjo është arsyeja pse ne kemi qenë gjithmonë shumë të qartë duke thënë se nuk mund të imagjinojmë një ofensivë në Rafah pa humbje të tmerrshme dhe të papërgjegjshme njerëzore,” shtoi ai.   /os/