BERLIN – Scholz refuzon të heqë të gjitha kufizimet për armët ukrainase

UASHINGTON, 12 korrik /ATSH-DPA/ – Kancelari gjerman Olaf Scholz ka hedhur poshtë kërkesën e presidentit ukrainas Volodymyr Zelensky për të hequr të gjitha kufizimet në përdorimin e armëve të furnizuara nga aleatët perëndimorë të Ukrainës.

“Askush nuk po planifikon të ndryshojë masat dhe udhëzimet e mëparshme për arsye të mirë. Është detyra jonë të sigurojmë që të ofrojmë mbështetje maksimale për Ukrainën, por të parandalojmë që lufta të përshkallëzohet në një luftë midis Rusisë dhe NATO-s. Dhe kjo kërkon mençuri, qartësi dhe qëndrueshmëri’’, theksoi Scholz në fund të një samiti të NATO-s në Uashington.

Aleatët më të rëndësishëm të Ukrainës, përfshirë Gjermaninë, autorizuan Ukrainën në fund të majit që të përdorë armët e ofruara prej tyre për të sulmuar pozicionet ushtarake në disa pjesë të territorit të Rusisë, për të parandaluar sulmet ruse në qytetin kufitar ukrainas të Kharkiv.

Në samitin e NATO-s të mbajtur në Uashington këtë javë, Zelensky u kishte kërkuar liderëve të heqin kufizimet se si forcat e vendit të tij mund të përdorin armët që ata furnizojnë.

“Nëse duam të fitojmë, nëse duam të mbizotërojmë, nëse duam të shpëtojmë vendin tonë dhe ta mbrojmë atë, ne duhet të heqim të gjitha kufizimet”, tha Zelensky./   /os/