Begaj pret ambasadoren Walt: Mirëpresim rritjen e investimeve zvicerane në Shqipëri

TIRANË, 3 shtator/ATSH/ Presidenti Bajram Begaj priti sot në një takim ambasadoren e re të Konfederatës Zvicerane në Shqipëri, Siri Walt, me rastin e prezantimit të Letrave Kredenciale.

Në fillim të takimit, Begaj shprehu besimin se mandati i saj do t’i shërbejë forcimit të mëtejshëm të marrëdhënieve të shkëlqyera mes dy vendeve.

Gjatë takimit u vlerësuan marrëdhëniet e ngushta dhe miqësore Shqipëri – Zvicër, të mbështetura në vlera të përbashkëta evropiane, dialogun e rregullt politik dhe një bashkëpunim të gjerë në fusha me rëndësi të veçantë, përfshirë qeverisjen, zhvillimin ekonomik, arsimin dhe formimin profesional, shëndetësinë, qeverisjen vendore dhe mbrojtjen e mjedisit.

Presidenti Begaj shprehu mirënjohjen për mbështetjen e vazhdueshme të Zvicrës në proceset e zhvillimit demokratik, ekonomik dhe social të Shqipërisë, si dhe për kontributin e saj në forcimin e institucioneve dhe qeverisjes vendore përmes programeve të bashkëpunimit për zhvillim dhe asistencës teknike.

Kreu i Shtetit çmoi në mënyrë të veçantë investimet e qeverisë zvicerane në zonat rurale.

“Ne kemi njerëz dhe një natyre të mrekullueshme. Investimet në këto zona në rritjen e cilësisë së jetesës janë një investim që bëjmë për brezat e rinj. Gjithashtu, ruajta e trendit pozitiv që Shqipëria ka në turizëm ndihmohet shumë nga këto investime”, u shpreh Begaj.

Kreu i Shtetit theksoi rëndësinë e forcimit të mëtejshëm të bashkëpunimit ekonomik dhe mirëpriti rritjen e investimeve dhe praninë e shtuar të bizneseve zvicerane në Shqipëri.

Në takim u vlerësua roli i rëndësishëm i diasporës shqiptare në Zvicër, si një urë e fortë lidhëse mes dy vendeve dhe popujve.

Duke folur me këtë rast, ambasadorja Walt përshëndeti mundësinë për të forcuar më tej lidhjet dypalëshe dhe për të thelluar bashkëpunimin mes Zvicrës dhe Shqipërisë.

“Zvicra dhe Shqipëria gëzojnë një marrëdhënie të ndërtuar mbi respektin reciprok, bashkëpunimin e ngushtë dhe një angazhim të përbashkët ndaj vlerave demokratike. Jam i nderuar të marr detyrat e mia në një moment kur ky partneritet vazhdon të thellohet dhe dëshiroj të rikonfirmoj, në emër të Këshillit Federal, përkushtimin e palëkundur të Zvicrës për forcimin e këtyre lidhjeve në vitet në vijim”, tha ambasadorja Walt.

Ambasadorja Walt përsëriti mbështetjen e vazhdueshme të Zvicrës për përpjekjet e Shqipërisë për integrimin evropian dhe theksoi Programin e Bashkëpunimit Zviceran 2026-2028 të nisur së fundmi, i cili konfirmon angazhimin afatgjatë të Zvicrës në zhvillimin e Shqipërisë. Programi fokusohet në forcimin e qeverisjes së mirë, promovimin e zhvillimit të qëndrueshëm ekonomik dhe përfshirjes sociale dhe përmirësimin e shërbimeve publike dhe infrastrukturës.

Zvicra dhe Shqipëria gëzojnë marrëdhënie të ngushta dhe në rritje të vazhdueshme. Zvicra ka qenë një partner zhvillimi i Shqipërisë që nga viti 1992 dhe ka kontribuar me rreth 500 milionë euro gjatë tre dekadave të fundit për të mbështetur fusha të tilla si qeverisja demokratike, arsimi dhe trajnimi profesional, zhvillimi ekonomik dhe shëndetësia.

Ambasadorja Walt pason ambasadoren Ruth Huber, e cila përfundoi mandatin e saj në gusht 2026 pasi shërbeu si ambasadore e Zvicrës në Shqipëri për katër vjet.

1 nga 3

/m.m/a.f/