Berisha me kreun e Asamblese Parlamentare te OSBE Grossruck Me PS rrezik recesioni

Shqetësimin për të ardhmen e Shqipërisë nën drejtimin e socialistëve ia shprehu edhe mikut austriak, Wolfgang Grossruck. Kryeministri Berisha priti deputetin e Parlamentit të Vjenës, njëkohësisht president i Asamblesë Parlamentare të OSBE-së. Me një ekip qeverisës pa eksperiencë dhe me premtime antiglobaliste, PS do ta cojë Shqipërinë në recession, paralajmëroi Berisha. 

Grossruck vlerësoi reformat e ndërmarra gjatë 8 viteve të fundit dhe uroi që Qeveria e ardhshme t’i vazhdojë ato. I shoqëruar nga disa zjarrfikës austriakë, vizita e Grossruck materializoi një premtim të dy viteve më parë për asistencë dhe ndihmë logjistike për zjarrfikësit shqiptarë të Vlorës, Shkodrës, Krujës e Laçit, me vlerë prej 500 mijë euro.

Kryeministri Berisha u takua gjithashtu edhe me deputetin kosovar të LDK-së, Armend Zemaj, i cili shoqërohej nga drejtues të forumit rinor të kësaj partie. Ata kërkuan ndihmën e Kryeministrit që Shqipëria të nderonte me dekorime 13 bashkëpunëtorë të ish-presidentit të Kosovës, Ibrahim Rugova. Berisha premtoi se do të ndikonte në këtë drejtim dhe përgëzoi bashkëpunimin mes të rinjve të Kosovës dhe Shqipërisë në nderim të patriotëve shqiptarë.