Bora, vështirësohet qarkullimi në veri

SHKODER - Ulja e temperaturave është shoqëruar me reshje dëbore e ngrica që kanë sjellë vështirësi lëvizjeje në kaset rrugore malore të qarkut të Shkodrës. Në aksin rrugor nacional Pukë- Fushë Arrëz, në dishezën e Plepit qarkullimi është i vështirë për shkak të ngricave. Vështirësi dhe në Qafë Malit nëpër të cilin qarkullojnë të gjithë mjetet që në rrugë tokësore hyjnë nga Kosova në Shqipëri e anasjelltas pasi vazhdon të jetë i bllokuar tuneli i Thirrës. Punonjës të Ndërmarrjes së Mirëmbajtjes së Rrugëve kanë hedhur skorie dhe kripë në mënyrë që të lehtësohet lëvizja e makinave ndërsa polica rrugore e Pukës po monitoron situatën. Vështirësi ka më shumë në lëvizjen e automjeteve të tonazhit të lartë. Reshjet e borës gjatë natës kishin bllokuar aksin Fushë Arrëz- Qafë Mali. Ndërhyrja e Ndërmarrjes së Mirëmbajtjes së Rrugëve ka liruar këtë aks. Probleme me ngrica ka dhe në rrugët që lidhin aksin nacional me komunën e Iballës e Blerimit. Në rrethin e Malësisë së Madhe, ka vështirësi lëvizjeje ngas Tamara drejt Vermoshit, ku në Qafë të Perdolecit bora ka aritur në rreth 20 cm dhe ngricat pengojnë lëvizjen.