Cher konflikte sërish me nusen e djalit/ Shtyhet seanca për kujdestarinë e financave të Elijah-ut

Cher ka siguruar shtyrjen e një seance gjyqësore në Los Angeles, ku po shqyrtohet kërkesa për mbikëqyrje gjyqësore të financave të djalit të saj, Elijah Blue Allman.

Muzikanti 50-vjeçar nuk u paraqit në seancë, as fizikisht dhe as përmes video-lidhjes. Për këtë arsye, gjyqtarja e Gjykatës së Lartë të Los Angelesit, Jessica A. Uzcategui, vendosi që çështja të shtyhej deri më 1 dhjetor.

Në sallën e gjyqit ishte e pranishme edhe bashkëshortja e Elijahut, Marieangela King, e cila kishte ardhur për ta mbështetur.

Duke folur për mediat pas seancës, King mbrojti pozicionin e saj dhe theksoi se dëshiron që bashkëshorti i saj të ketë mundësinë të vazhdojë trajtimin.

Si gruaja e Elijahut prej 13 vitesh, e dua atë dhe dua më të mirën për të. Ky është një plan i fortë trajtimi afatgjatë.
Ajo shtoi se, nëse Cher do të kontrollonte zgjedhjen e kujdestarit, kjo mund të ndikonte negativisht në procesin e rikuperimit të Elijahut.

Gjatë seancës, gjyqtarja bëri të ditur se Allman e kishte informuar më parë gjykatën se dëshironte të përfaqësonte veten. Megjithatë, atij i ishte shpjeguar se kjo nuk mund të bëhej pa një avokat.

Meqë as Elijah dhe as avokati i tij, Steven Brumer, nuk u paraqitën në seancë, gjykata caktoi sërish një përfaqësues ligjor dhe vijoi me procedurat.

Cher kishte kërkuar disa ditë më parë që procedurat në Kaliforni të shtyheshin për rreth 120 ditë, në mënyrë që të pritej vendimi i gjykatës në New Hampshire për çështjen e kujdestarisë.

Sipas një mocioni të paraqitur më 28 gusht, Spitali Shtetëror i New Hampshire kishte nisur procedurat e kujdestarisë më 7 korrik, duke kërkuar masa që lidhen si me personin, ashtu edhe me pasurinë e Allman.

Cher argumenton se mbikëqyrja gjyqësore është e nevojshme për shkak të vështirësive të djalit të saj me shëndetin mendor, varësinë dhe menaxhimin e parave.

Sipas dokumenteve të paraqitura më herët, këngëtarja pretendon se Elijah merr rreth 120 mijë dollarë në vit nga një fond besimi i krijuar nga pasuria e babait të tij të ndjerë, Gregg Allman, dhe se paratë shpenzohen me shpejtësi.

Ndërkohë, procedurat penale ndaj Elijahut në New Hampshire vijojnë pas arrestimit të tij më 27 shkurt, lidhur me një incident në St. Paul’s në Concord.

Çështja e kujdestarisë pritet të rikthehet përpara gjykatës në Los Angeles më 1 dhjetor, ndërsa paralelisht pritet të zhvillohet edhe procedura në New Hampshire.