Dinamo City, pas Berishës zyrtarizon Guindo
TIRANË, 18 gusht /ATSH/ Dinamo vijon forcimin e skuadrës për të arritur kualifikimin për herë të parë në grupet e kompeticioneve europiane.
Kryeqytetasit kanë mbyllur boshllëqet e lëna nga Zabërgja dhe Itodo, duke zyrtarizuar dyshen e re të sulmit. Pas Bernard Berishës, me nëndetësen blu ka firmosur edhe Guindo.
Një njohje e vjetër e kampionatit shqiptar, pasi në të shkuarën është aktivizuar me disa skuadra, ndërsa vjen te Dinamo pas eksperiencës te Egnatia.
28-vjeçari ka firmosur për 2 sezone me fituesit e Kupës së Shqipërisë, për t’u vënë në urdhërat e teknikut Ilir Daja dhe për të qenë gati për sfidën e mesjavës ndaj Jagiellonia.
Përballë polakëve, si Berisha ashtu edhe Guindo pritet të zbresin në fushë nga minuta e parë, për të qenë armë shtesë për Dinamon.
Kryeqytetasit tentojnë që të kualifikohen në grupin e Conference League, teksa pengesë e fundit do të jetë Jagiellonia, skuadër e fortë në letër por jo e pakalueshme.
Me dyshen Berisha dhe Guindo, 18-herë kampionët e vendit shpalosin edhe objektivin madhor në sezonin e ri, rikthimin e titullit kampion në shtëpi, diçka që mungon prej vitit 2010.
/gj.m//a.f/