Dita e Verës në kryeqytet, aktvitete festive në qendër dhe në kodrat e liqenit

Mijëra qytetarë u mblodhën në sheshet dhe rrugët kryesore të Tiranës për të festuar Ditën e Verës.

Tingujt e muzikës popullore, aromat e ballokumeve dhe panairet me produkte tradicionale krijuan një mozaik emocionesh që i përfshiu të gjithë, të vegjël e të mëdhenj.

Tullumbace, lodra, lule dhe balona “pushtuan” vendin, ndërsa fëmijët vendosën veroret.

Festimet e organizuara nga Bashkia me rastin e Ditës së Verës nisën që në orët e para të mëngjesit, duke filluar nga bulevardi “Dëshmorët e Kombit”, sheshi “Skënderbej” deri te kodrat e Liqenit Artificial.

Në qendër, qytetarët ndoqën fluturimin me balona, ndërsa në kodrat e Liqenit të cilat janë dekoruar me lule u mbajt panairi i Artizanëve dhe Panairi Ushqimor.

Po ashtu një ekspozitë e madhe nga koleksioni i makinave “Retro” është mbajtur pranë sheshit “Skënderbej”.

Dita e Verës është një festë me origjinë pagane dhe ajo i kushtohet ringjalljes së natyrës pas dimrit./vizionplus.tv