“Do të jenë në telashe”, Trump jep urdhrin: Ushtria amerikane do të rrëzojë avionët e Venezuelës që na afrohen!

Ushtria amerikane është e autorizuar të rrëzojë avionë venezuelianë nëse komandantët i gjykojnë ata si kërcënim, tha Presidenti Donald Trump. Paralajmërimi i tij pasoi raportimet se avionë venezuelianë kishin fluturuar pranë anijeve luftarake amerikane që merrnin pjesë në atë që Uashingtoni e përshkruan si një mision antidrogë pranë vendit të Amerikës së Jugut.

I pyetur nga gazetarët të premten se çfarë do të bënte SHBA-ja nëse avionët luftarakë venezuelianë fluturojnë përsëri pranë anijeve detare amerikane, Trump paralajmëroi se “ata do të jenë në telashe”. “Nëse na vënë në një pozicion të rrezikshëm, ne do t’i rrëzojmë”, theksoi ai. Trump hodhi poshtë pretendimet e Karakasit se Uashingtoni po kërkonte të rrëzonte qeverinë e Presidentit Nicolas Maduro. “Epo, nuk po flasim për këtë, por po flasim për faktin se patët zgjedhje që ishin shumë të çuditshme”, tha ai.

Në vend të kësaj, ai e cilësoi praninë ushtarake amerikane pranë Venezuelës si pjesë të një goditjeje kundër trafikut të drogës. “Miliarda dollarë drogë po derdhen në vendin tonë nga Venezuela. Burgjet e Venezuelës janë hapur për vendin tonë”, tha Trump, duke shtuar se forcat amerikane do të synojnë anijet e dyshuara për transportimin e narkotikëve.

Në javët e fundit, SHBA-të vendosën të paktën tetë anije luftarake dhe një nëndetëse sulmi në Karaibe, ndërsa dërguan dhjetë avionë luftarakë F-35 në Porto Riko për të penguar fluturime të mëtejshme venezueliane. Më herët këtë javë, SHBA-të goditën një anije që pretendohej se ishte e lidhur me një operacion droge, duke vrarë 11 persona.

Ndërsa tensionet me SHBA-në u rritën, Maduro paralajmëroi se vendi i tij do të kalonte në një fazë “lufte të armatosur” nëse sulmohej.

Marrëdhëniet midis Shteteve të Bashkuara dhe Venezuelës kanë qenë të tensionuara për vite me radhë. Uashingtoni refuzoi të njihte rizgjedhjen e Maduros në vitin 2018, duke mbështetur në vend të kësaj opozitën e vendit. Administratat e njëpasnjëshme të SHBA-së kanë vendosur sanksione gjithëpërfshirëse mbi sektorin e naftës dhe sistemin financiar të Venezuelës.