“Do të përdorë si mburojë fustanin e Lubisë”, Berisha: Rama do ta mbrojë me çdo kusht se mbron veten e tij

Kreu i PD, Sali Berisha reagon pas kërkesës së SPAK për heqjen e imunitetit të Belinda Ballukut dhe reagimit të kryeministrit Edi Rama në “X”.

Sipas kreut demokrat, në reagim të kërkesës së Prokurorisë për heqjen e imunutetit, Rama në rreshta theksoi se, Balluku do të mbrohet me çdo çmim sepse sipas Berishës, kështu ai mbron veten e tij.

“50 milionë euro i kanë ndarë bashkë”, thotë Berisha.

Reagimi i plotë: 

“Rama do të përdorë si mburojë fustanin e Lubisë!

Në reagim të kërkesës së Prokurorisë për heqjen e imunutetit dhe arrestimin e Lubisë, Rama nëpër rrjeshta shpall se ai do mbrojë Lubinë me çdo çmim sepse mbron veten e tij. 50 milionë euro i kanë ndarë bashkë.

Reagimi i tij në X mund të mblidhet me dy fjalë: “Jetën e japim Lubinë nuk e japim.”

Imagjinoni kur t’i komunikojnë akuzën vetë atij?

Qytetarë është ora juaj! Populli do të thotë fjalën e tij me 22 Dhjetor!”.

Prokuroria e Posaçme (SPAK) njoftoi ditën e sotme se i ka kërkuar Kuvendit të Shqipërisë heqjen e imunitetit për zv/kryeministren Belinda Balluku.

Balluku është marrë zyrtarisht e pandehur nga SPAK javë më parë, ndërsa kjo lëvizje pritet t’i hapë rrugë arrestimit të saj.

Kujtojmë që datë 12 dhjetor, Gjykata Kushtetuese vendosi rikthimin në detyrë për zv.kryeministren.