Dritan Prifti: Rama nuk e mbajti premtimin, PS-në tani e drejton Meta

“Kam pasur oferta nga PD, por nuk pranova, duhet rotacion

Deputeti Dritan Prifti në një intervistë për emisionin Opinion në News 24 ka deklaruar se do të kandidojë i vetëm në zgjedhjet parlamentare, më 23 Qershor. Dritan Prifti duke akuzuar kreun e PS Edi Rama, tha se ai tanimë po drejtohet nga aleati, Ilir Meta. Ai rrëfen edhe bisedimet që kreu me Aleancën Kuq e Zi, duke mos fshehur dëshirën që të ishte pjesë e kësaj partie.

A mund të hyjmë direkt dhe në bisedë? Pozicionimi që do keni në zgjedhje…
Ka qenë një odise e gjatë për ta marrë këtë vendim, por pa dashur të hyj tek odiseja e gjatë unë kam marrë vendimin të kandidoj si një deputet i zgjedhur nga zgjedhësit, jashtë çdo koalicioni, pra deputet i pavarur. E kam vendosur këtë në konsultim me zgjedhësit e mi që me shumicë më kanë zgjedhur prej 12 vitesh në Parlament. Do shkoj në KQZ të depozitoj kërkesën, mandatin e deputetit si një kandidat i propozuar nga zgjedhësit.
Pse ky vendim? Nuk ju pëlqeu propozimi nga AK?
Nuk kam pasur një propozim nga AK, janë spekulime.
As që të jeni në krye të listës së qarkut të Fierit?
Jo nuk ka asnjë ftesë, propozim, ka pasur diskutime me AK, por jo propozim. Pas ikjes nga LSI, u afrova me Ramën, por premtimi që mora nga Rama nuk u mbajt. Më pas pasi u afrua me Metën, ai nuk u kujtua më. Duhet tia ketë vënë si kusht Meta.
Mendon se duhet tia ketë vënë?
Po besoj se po, sepse pesha që i është vënë nga Meta duhet të ketë qenë më e rëndë se pesha politike. Kam folur gjatë me Paskal Milon, Gjergj Kojen. Ardhja e LSI sipas tyre do të kontribuojë në humbjen e Berishës, por sapo flisja me Gjinushin, apo tek tjetri, telefonohej menjëherë Gjinushi dhe menjëherë i thuhej, nuk duhet të afrohet Prifti. Kuptova së kryetar i PS nuk është Rama, por Meta. D.m.th që brenda një force politike të majtë nuk më lejohet të votohem si kandidat sepse nuk do Meta.
Dhe si doli pas kësaj?
Mendoj se doli më mirë. Unë do kem emrin tim, si Dritan Vlash Prifti në listat e deputetëve, dhe do të më kandidojnë zgjedhësit për kontributin që kam dhënë në 12 vjet në Parlament.
Marrëdhëniet me Ramën?
Para se të nxirrja videon kanë qenë maksimale. Por me afrimin e z. Meta në koalicion, ai nuk pati as burrërinë të më thoshte që kjo që ndodhi, ndodhi tanimë dhe ti z. Prifti gjej ndonjë rrugë tjetër. Por ai kishte mirëkuptimin tim të plotë për tërheqjen e LSI në koalicion, por jo mirëkuptim, që veproi kështu.
Aleanca Kuq e Zi, çfarë vlerësimi keni?
Unë e vlerësoj AK si një forcë opozitare, më opozitare se aleanca PS dhe LSI. Është një forcë realiste opozitare në Shqipëri dhe do kisha kënaqësinë të përfaqësoja këtë forcë, por më vjen keq që shoh teatro si kjo sot, që mori disa nga AK dhe u tha i mirëpret në PS. Pra këto lloj teatrosh që do të sulmojnë Aleancën Kuq e Zi, se u larguan dhe 5 veta nuk shkojnë se Aleanca është opozitare. Afati i fundit dhe askush nuk e di se në çfarë liste është. Tre deputetë të PS u larguan për këtë çështje.
Të tjerë nuk mendojnë kështu?
Nuk është e thënë të kenë të gjithë të njëjtin mendim…
Nëse AK ju bën ofertë tani, sapo të dilni nga emisioni, çdo të vendosni, do të ndryshonit vendim?
Unë nuk i kam dorëzuar ende dokumentat në KQZ dhe çdo gjë mund të ndodhë. Unë kam gjetur rehat se do të votohet për emrin e Dritan Priftit. Kam gjetur rehat rithem, me familjen kam diskutuar. Ata më thanë se nuk është dinjitoze që të futesh si përfaqësues i pari në listën e kësaj partie. Por duke u futur në ndonjë parti, emri im nuk do ishte në asnjë listë dhe do ishte një artificë, që në gjykimin tim nuk do ishte e drejtë. Nuk ka asnjë problem, as qejfmbetje madje ka mirëkuptim të madh nga z. Spahiu.
Nëse do ishit ju kandidat për deputet në Fier do largohej automatikisht z. Myslym Pashai
Nuk e di kush kandidon në Fier dhe ku kandidon z. Pashai.
Po nga PD keni pasur oferta?
Nuk kam pranuar asnjë ofertë nga spektri i djathtë. Kam pasur ofertë, biseda për tu orientuar drejt një kandidimi nga ata, por në mënyrë të prerë nuk kam pranuar asnjë ofertë nga e djathta dhe mendoj se ka ardhur koha për rrotacion dhe nuk ia vlen me PD.
Si i komentoni të larguarit e AK, sepse Spahiu nuk bëri koalicion me PS?
Besoj se inati ka qenë i drejtpërdrejtë dhe menjëherë kur nuk u realizua koalicioni, Rama e ka marrë Spahiun në telefon dhe i ka thënë, do të shkatërroj. Por i them Ramës se po gabon se po bën të njëjtin gabim si Nano me LSI. E ka shumë gabim, sepse ka shumë të majtë që nuk e gjejnë veten tek Rama e Meta, por shkojnë tek Spahiu sepse e shohin si opozitar të fortë. Z. Rama ka gabuar me shumë gjëra, me Kushtetutën me 21 Janarin, nuk e ka monopolin e opozitarit z. Rama. Unë them se kjo aleancë, AK i ka prishur shumë punë PS, se 3-4 deputetë do i fitojë. Kurse për PS mesazhi që ka dhënë në popull është se askush nuk beson më se ka ndonjë moral tek kjo parti. Me bashkimin me Metën, nuk ka më moral politik. Do ketë shumë abstenim nga zgjedhësit e majtë. Nuk do ja japin votën as PS, as Metës. PS ka humbur shumë. PS do marrë, a nuk do marrë 60 vota. Çfarë ndryshimi do të ketë në qeveri? Meta ishte Meta do vijë prapë, do jetë e njëjta pamje. Unë besoj tek rrotacioni, por rrotacioni duhet të vijë nga AK, jo nga PS e LSI.
Çfarë ndodh nëse nuk ju vjen oferta e AK. Nëse kjo ofertë nuk vjen dhe nëse siguroni mandatin më 23 qershor dhe nëse PS e LSI, nesër qeverisin, ju z. Prifti si do të kontribuoni?
Besoj se me të majtën, sepse unë i kam lidhje më të forta me të majtën. I kam dy miq, një Gramoz Ruçi dhe tjetri, Tom Doshi, por do varet shumë sesi do sillet PS në këto dy muaj. Nëse PS do më shohë në këto zgjedhje si kundërshtar të vetin atëherë do kemi zgjedhje më vete.
Po KQZ, çfarë komentesh do bëni për situatën në këtë institucion?
Rama ka bërë gabim, nuk duhet të tërhiqte anëtarët. Tia lësh fushën bosh kundërshtarit është gabim. Sepse ata marrin vendime dhe pse janë vetëm 4. Rama bën gabime të tilla çdo prag zgjedhjesh. Ta harrojë që ka riformatim në KQZ, për mendimin tim, duhet ta harrojë këtë. Mazhoranca e ka të drejtën e riformatimit. Veprimi për të hequr komisionerët është gabim fatal. KQZ, është duke punuar aktualisht, apo jo.