“E kanë rrahur dhe keqtrajtuar” – Ervin Goci denoncon dhunën e policisë ndaj pedagogut Alfred Bushi: E arrestuan pa bërë asgjë! Autoritetet të reagojnë në mënyrë urgjente

Pedagogu Ervin Goci ka denoncuar dhunën e ushtruar nga policia ndaj pedagogut Alfred Bushi, duke theksuar se është arrestuar pa bërë asgjë, dhe se është rrahur dhe keqtrajtuar nga efektivët kur ndodhej në komisariat.

Në një prononcim për mediat, ai kërkoi reagimin e menjëhershëm të autoriteteve përkatëse, si dhe solidarizimin e kolegëve të tij.

“Në ambientet e komisariatit është keqtrajtuar pedagogu Alfred Bushi i shkencave politike. Është arrestuar duke mos bërë asgjë. Është intelektual, përkthyes dhe botues. E kanë marrë me dhunë, dhe kur doli pashë që ka denoncuar Policinë duke thënë se më kanë rrahur dhe keqtrajtuar brenda.

E di integritetin e njeriut, nuk ka asnjë shans që të gënjejë. I bëj thirrje kolegëve që të solidarizohen dhe autoriteteve të reagojnë në mënyrë urgjente sepse kur rrihet një pedagog, pasi e kishin shënjestruar si pedagog, dhe e kanë rrahur.”, tha Goci.