“E vështirë të merresh vesh me Ukrainën”, Trump: Rusia i ka të gjitha kartat në dorë

Presidenti Donald Trump tha se beson që do të jetë më e lehtë të arrihet një marrëveshje përfundimtare me Moskën sesa me Kievin për t’i dhënë fund konfliktit midis Rusisë dhe Ukrainës, duke pohuar se presidenti rus Vladimir Putin i ka të gjitha kartat në dorë.

Trump theksoi se çdokush në pozicionin e Putinit do të bombardonte Ukrainën duke pasur parasysh dinamikën aktuale të fushëbetejës.

Ai tha se dëshiron ta ndihmojë Ukrainën, teksa theksoi se Kievi duhet të marrë situatën në dorë dhe të punojë për një marrëveshje paqeje.

“Mendoj se po ecim shumë mirë me Rusinë, por për momentin ata po e bombardojnë Ukrainën pa mëshirë. Dhe po e them sinqerisht, po e gjej më të vështirë të merrem me Ukrainën, sepse ata nuk i kanë kartat në dorë,” tha Trump në Zyrën Ovale.

“Sa i përket arritjes së një marrëveshjeje përfundimtare, mund të jetë më e lehtë të negociohet me Rusinë, gjë që është befasuese, sepse ata kanë të gjitha kartat,” shtoi ai.

Më herët të premten, Trump kishte kërcënuar me sanksione të reja ndaj Rusisë, ndërsa ajo vazhdon sulmet e mëdha në Ukrainë.

“Në fakt, mendoj se ai po bën atë që do të bënte çdokush tjetër. Mendoj se ai dëshiron ta ndalojë dhe ta zgjidhë këtë çështje,” tha Trump.

“Ai po e godet atë vend. Dhe mendoj se ndoshta çdokush në atë pozicion do të vepronte njësoj tani. Ai dëshiron t’i japë fund kësaj,” përfundoi Trump.