Edicioni i 63-të i këngës për fëmijë – 30 këngët konkurruese, kompozitorë emra të njohur e të rinj

Organizatorët e Festivalit të 63-të të Këngës për Fëmijë në Shkodër kanë publikuar listën me emrat e 30 kompozitorëve të përzgjedhur për eventin tradicional, i cili mbledh çdo vit artistët më të përkushtuar në krijimin e këngëve për fëmijë.

Në listë bëjnë pjesë emra të njohur të muzikës shqiptare si: Zef Çoba, Adrian Hila, Frederik Ndoci, Shpëtim Saraçi, por edhe kompozitorë të rinj që synojnë të sjellin risi dhe energji të re në skenën e muzikës për fëmijë.

“Ishte një numër shumë i madh dhe kjo bëri që dhe pranimi i këngëve mos të ishte 20 siç ka qenë gjithmonë por te jetë 30 numri i këngëve”, u shpreh Ermir Zoga, Përgjegjës i Artit, QKF “Kujtim Alija”.

Interesi ka qenë i madh për të marrë pjesë në edicionin e 63-të të festivalit sipas Zogës.

“Unë besoj realisht që festivali i Shkodrës është festivali më i rëndësishëm në Shqipëri”, u shpreh Zoga.

Ndonëse nuk janë zyrtarizuar akoma datat e festivalit, mendohet që nata finale të mbahet më 1 qershor dhe pritet të jetë një tjetër edicion i mbushur me ngjyra, kreativitet dhe mesazhe pozitive për fëmijët. Ky edicion synon të ruajë traditën, por edhe të përqafojë prurjet e reja në muzikën për fëmijë, duke sjellë një spektakël të denjë për publikun e vogël.

Gazetar: Marjo Gjini

/rtsh.al/