Elena Pelushi emërohet Zëvendësinspektore e Lartë e Drejtësisë, profili i magjistrates
Zyra e Inspektorit të Lartë të Drejtësisë (ILD) ka zyrtarizuar emërimin e Elena Pelushit në detyrën e Zëvendësinspektores së Lartë të Drejtësisë. Vendimi u mor nga Inspektori i Lartë, Artur Metani, pas një procesi përzgjedhjeje që përfshiu votimin e fshehtë nga Mbledhja e Përgjithshme e Inspektorëve, në përputhje me kuadrin ligjor për organet e qeverisjes së sistemit të drejtësisë.
Procesi i përzgjedhjes dhe votimi
Procedura e ndjekur u bazua në ligjin nr. 115/2016 dhe vendimin specifik të vitit 2023 për përzgjedhjen e zëvendësit të kreut të ILD-së. Pas shqyrtimit të kandidaturës dhe zhvillimit të votimit, trupa e inspektorëve vendosi t’i propozojë Inspektorit Artur Metani emrin e Pelushit si kandidaturën më të përshtatshme për këtë post të lartë hierarkik.
“Duke marrë në konsideratë mendimin këshillues të Mbledhjes së Përgjithshme të Inspektorëve dhe integritetin profesional të treguar gjatë ushtrimit të detyrës, u vendos emërimi i Pelushit në këtë funksion,” u bë me dije nga institucioni i ILD-së.
Një karrierë e gjatë në prokurori dhe inspektim
Elena Pelushi vjen në këtë detyrë me një përvojë të pasur në sistemin e drejtësisë shqiptare. Ajo është diplomuar në vitin 2002 në Shkollën e Magjistraturës, në profilin prokuror, detyrë të cilën e ka ushtruar për gati dy dekada.
Në shkurt të vitit 2021, karriera e saj mori një drejtim të ri kur u komandua pranë Zyrës së Inspektorit të Lartë të Drejtësisë si inspektore magjistrate. Përveç përvojës në terren, Pelushi njihet për formimin e saj të vazhdueshëm profesional përmes trajnimeve ndërkombëtare dhe zotërimin e tre gjuhëve të huaja: frëngjisht, italisht dhe anglisht.
Kompetencat dhe mandati
Roli i Zëvendësinspektorit të Lartë është jetik për mbarëvajtjen e institucionit. Pelushi do të ushtrojë të gjitha kompetencat e Inspektorit të Lartë në rastet e mungesës së tij ose kur vendi është përkohësisht i lirë.
Mandati i saj është përcaktuar për një periudhë dyvjeçare, me të drejtë riemërimi. Megjithatë, ligji parashikon kufizime specifike: Zëvendësinspektori nuk mund të ushtrojë kompetenca organike që lidhen me nxjerrjen e urdhrave për mbarëvajtjen e punës apo hetimin e shkeljeve që i takojnë ekskluzivisht titullarit.
/rtsh.al/