Erdogan viziton Gjermaninë në kohën kur dallimet për luftën Izrael-Hamas po zgjerohen

Presidenti turk Recep Tayyip Erdogan,  do të vizitojë sot Gjermaninë ku pritet të ketë një takim kokë më kokë me kancelarin Olaf Scholz.

Një prej temave që pritet të diskutohet  është  lufta në Gaza , për të cilën dy liderët ndajnë qëndrime të ndryshme.

Gjermania është një aleat i vendosur i Tel Avivit  dhe ka kundërshtuar thirrjet për një armëpushim.

Nga ana tjetër Erdogan ka mbajtur një qëndrim  gjithnjë e më të ashpër kundër Izraelit , ndërsa së fundmi e  ka cilësuar edhe si shtet terrorist.

I pyetur në fillim të kësaj jave për komentet e Erdogan,  kancelari gjerman  nuk iu drejtua  liderit turk me emër, por tha se “akuzat që po bëhen kundër Izraelit janë absurde.”

Por pavarësisht kësaj  dy liderët pritet të kenë edhe tema te tjera për të diskutuar.

Turqia shihet si një partner i vështirë, por thelbësor në Gjermani ,shteti në të cilin jetojnë më shumë se 3 milionë njerëz me prejardhje turke. Po ashtu Ankaraja ka një rol të rëndësishëm  në frenimin e migracionit  në BE.

Nga ana tjetër lideri turk  do të ketë nevojë  për mbështetjen e Kancelarit Olaf Scholz për blerjen e  40 avionëve  luftarakë.

Kjo është vizita e parë e presidentit turk, Recep Tayyip Erdogan, në Gjermani që nga viti 2020.