“Fieri është kryeqyteti i socialistëve”, Rama: E ngjitëm flamurin shqiptar në ato maja ku mblidhet bota

Kryeministri Edi Rama ka zhvilluar takimin përmbyllës në Fier. “Drejt finishit për Shqipërinë 2030 në Bashkimin Europian”, kështu është shprehur kryesocialisti Rama i cili në fokusin e tij gjatë takimeve elektorale ka pasur gjithashtu procesin e integrimit europian.

Rama i ka bërë thirrje shqiptarëve që të votojnë masivisht në zgjedhjet parlamentarë të 11 majit. Gjithashtu nuk i ka kursyer kritikat edhe për opozitën.

Rama: Është një det kuqezi dhe s’ka si të jetë ndryshe sepse Tirana është kryeqyteti i Shqipërisë, Fieri është kryeqyteti i socialistëve. Kur kemi nisur këtë rrugë së bashku, ky shesh nuk ekzistonte. Gjanica e bllokuar që mblidhte plehrat dhe që derdhte llumrat në rrugët e Fierit. Ashtu sikundër ne e kthyem Gjanicën nga një plagë në një vlerë dhe në një kartolinë krenarie për këtë qytet ashtu në e kthyem organizmin e Shqipërisë nga një plagë e hapur në një emër që na bën krenar kudo ku shkojmë në botë. Nuk e ulim më kokën, nuk kemi më zor të themi ‘jam shqiptar’. Nuk kemi më asnjë vështirësi, përkundrazi, jemi të kënaqur të tregojmë për vendin tonë sepse gjithmonë e më shumë njerëz nga Europa dhe bota vijnë në vendin tonë. Në këto vite ne kemi bërë shumë gjëra, por gjëja e gjërave ka qenë dinjiteti që i kemi dhënë flamurit kuqezi, të cilin deri dje e valëvisnim me krenari në stadiume, por nuk  shikonim të qëndronte mes familjeve të tjerë. E ngjitëm flamurin shqiptar në ato maja ku mblidhet bota. Europa, ku mblidhen ata që marrin vendime. Madje disa herë ky flamur ishte flamuri që udhëhoqi tryeza të mëdha ndërkombëtare.