“Futbolli është maskilist”/ Kosovare Asllani ankohet për sportin më popullor në botë

Në karrierë arriti kulme. Kosovare Asllani është padyshim një nga emrat më të njohur të futbollit të femrave, dhe ende luan ndonëse ka kaluar moshën 35-vjeçare.

Sulmuesja suedeze, me origjinë shqiptare nga Kosova, që ka veshur në karrierë fanelën e Realit, Milanit, Mançester Sitit apo Paris SG, ishte e ftuar në mbrëmjen e ndarjes së çmimeve Laureus në Madrid, dhe aty bëri një reflektim për gjendjen e futbollit të femrave.

“Vajzave të sotme u them që të luajnë futboll, sepse mund të jetohet me futbollin. Them se duhet të kenë besim tek vetja, dhe të mos dëgjojnë njerëzit që u thonë të kundërtën, sepse ka shumë komente negative për futbollin e femrave. Kjo sepse ne gjithmonë na krahasojnë me futbollin e meshkujve. Ky është një nga sportet e pakta ku krahasohen meshkujt me femrat. Në tenis asnjëherë nuk thuhet që Rafael Nadal është më I mirë se një teniste femër. Ne duhet ta shijojmë sportin kështu siç është, edhe ne femrat, edhe meshkujt për pjesën e tyre”.

Asllani ka shënuar 122 gola në 294 ndeshje me ekipet e klubeve, dhe 48 gola për kombëtaren e Suedisë për femra në 196 ndeshje.

Ajo ka dalë dy herë nënkampione olimpike me Suedinë, dhe ka fituar medaljen e bronzit në Botëror.

Ka dalë kampione në Angli dhe ka fituar Kupën e Anglisë, dy herë kampione e Suedisë dhe është shpallur futbollistja suedeze e vitit në 2017./abcnews.al