GAZA – Një tjetër foshnjë e porsalindur vdes nga hipotermia
GAZA, 30 dhjetor /ATSH-DPA/ – Një foshnjë trejavëshe ka vdekur nga hipotermia në Rripin e Gazës, deklaruan sot spitali ”Al-Aqsa” në Deir al-Balah dhe babai i saj.
Agjencia zyrtare palestineze e lajmeve WAFA raportoi se fëmija vdiq menjëherë, pasi vëllai i tij binjak gjithashtu vdiq nga hipotermia.
Ministria e Shëndetësisë e kontrolluar nga Hamasi tha se gjashtë të porsalindur kishin vdekur për shkak të kushteve të ftohta në Rripin e Gazës, me shumë familje të detyruara të lënë shtëpitë e tyre dhe të jetojnë në strehimore të improvizuara.
Ministria e Jashtme e Izraelit vuri në dyshim besueshmërinë e raporteve.
Ajo postoi në X se kishte prova se mjekët në rajon po publikonin propagandë të Hamasit dhe jo fakte.
Temperaturat e natës në rajon kohët e fundit kanë rënë nën 10 gradë Celsius në disa raste, të shoqëruara me erëra të forta dhe shi, dhe organizatat e ndihmës kanë parashikuar një rritje të sëmundjeve tek fëmijët.
Sipas Kombeve të Bashkuara, gati një milion njerëz do të duhet të durojnë dimrin pa strehim adekuat, pasi një pjesë e madhe e popullsisë palestineze prej rreth dy milionë banorësh është shpërngulur nga luftimet./ /os/