GJERMANI – AfD e ekstremit të djathtë fiton në Turingia dhe humbet në Saksoni

LAJPCIG/ERFURT, 2 shtator /ATSH-DPA/ – Alternativa e ekstremit të djathtë për Gjermaninë (AfD) realizoi një fitore historike në një palë zgjedhje shtetërore të vëzhguara nga afër, me rezultatet paraprake që u dhanë atyre një fitore të qartë në Turingia, ndërsa mbetën prapa vetëm nga një diferencë të ngushtë në Saksoni.

Fitorja e AfD-së në Turingia shënoi herën e parë që nga humbja e Gjermanisë naziste në Luftën e Dytë Botërore, që një parti e ekstremit të djathtë fitoi zgjedhjet mbarëkombëtare në vend.

Në Saksoni, kristian-demokratët e qendrës së djathtë (CDU) siguruan një epërsi të vogël mbi AfD, sipas rezultateve paraprake nga zyra elektorale.

Rezultatet e zgjedhjeve – dhe bisedimet pasuese të koalicionit – do të vendosin balancën e pushtetit në parlamentet shtetërore në Turingia dhe Saksoni, të cilët secili kanë pushtet të konsiderueshëm mbi çështjet rajonale.

Ndërkohë, tre partitë në qeverinë e koalicionit kombëtar të kancelarit gjerman Olaf Scholz, u përballën me një mbrëmje të errët me humbje pothuajse kudo.

Rezultatet paraprake nga komisioni zgjedhor e vendosin AfD në 32,8% të votave në Turingia.

Kjo i dha partisë një epërsi të qartë ndaj CDU-së, e cila grumbulloi 23,6%.

Megjithatë, kandidati kryesor i CDU-së në Turingia, Mario Voigt, pretendoi një mandat për të formuar qeverinë e ardhshme në këtë land.

Voigt tha se rezultatet e zgjedhjeve kërkonin ndryshime politike në land, i cili është qeverisur nga një koalicion i krahut të majtë të udhëhequr nga Bodo Ramelow i partisë së majtë ”Die Linke” (”E Majta”).

Rezultatet paraprake treguan se CDU siguroi një fitore të ngushtë ndaj AfD në Saksoni.

Pas numërimit të të gjitha votave, CDU siguroi 31,9% të votave, pak përpara AfD që mori 30,6%.

BSW mori 11,8%, ndërsa SPD fitoi 7,3%.

Të Gjelbrit siguruan 5,1% të votave, ndërsa partia ”Die Linke” ra në 4,5%, por do të rikthehet në parlamentin e landit, pasi fitoi dy mandate të drejtpërdrejta./  a.jor.