Gadi Eisenkot i përgjigjet Donald Trump: Vetëm izraelitët mund ta zgjedhin udhëheqësin e tyre

Gadi Eisenkot, rivali kryesor politik i Benjamin Netanyahut në zgjedhjet e ardhshme parlamentare në Izrael, ka reaguar ndaj deklaratave të Donald Trump në mbështetje të kryeministrit aktual.

Gjatë një konference për mediat të zhvilluar në Tel Aviv, Eisenkot komentoi deklaratën e presidentit amerikan — i cili sapo kishte shprehur “mbështetjen e tij të plotë dhe totale” për Netanyahun në garën elektorale — duke i mëshuar rëndësisë së sovranitetit të votuesve vendas.

Pasi vlerësoi figurën e udhëheqësit amerikan, Eisenkot nënvizoi se vendimmarrja politike i përket vetëm qytetarëve vendas, duke deklaruar se “e admiron presidentin amerikan”, por shtoi se “Izraeli është një vend demokratik: vetëm izraelitët mund të zgjedhin udhëheqësit e tyre”.

Deklarata e tij vjen në një moment mjaft intensiv të fushatës elektorale, vetëm pak ditë përpara procesit zgjedhor të caktuar për më 27 tetor.

/rtsh.al/