Gara për Tiranën, a e ka PD gati kundërshtarin e Manastirliut? Këlliçi zbulon emrat

Kryeministri Edi Rama në mbledhjen e djeshme të Asamblesë socialiste zyrtarizoi emrin e Ogerta Manastirliut si kandidaten e PS për Bashkinë e Tiranës.

“Po PD a e ka gati një kandidat për bashkinë më të madhe në vend?”,  kjo ishte pyetja që iu bë në QUO VADIS nga moderatorja Pranvera Borakaj, nënkryetarit të grupit parlamentar demokrat Belind Këlliçi.

I ftuar në studio, Këlliçi tha se Ilir Alimehmeti dhe Jorida Tabaku janë dy emra potencial që mund të sjellin fitoren e opozitës në Tiranë, megjithatë duhen bërë konsulta me bazën dhe me aleatët më parë.

Pjesë nga biseda:

Borakaj: Keni ju në figurë sot?

Këlliçi: Po patjetër që po janë disa.

Borakaj: Cilët?

Këlliçi: Është Ilir Alimehmeti, i cilli ka qenë kandidat edhe përballë meje brenda partisë.

Bregu: Mesa di unë Alimehmeti nuk e ka më ambicie.

Këlliçi: Kjo do të jetë pjesë e strukturave.

Borakaj: Je me teorinë e Agron Shehajt.

Këlliçi: Jam me gjysmëteorinë e Agron Shehajt. Do të duhet një figurë politike e dakordësuar.

Myslimaj: PD e ka të vështirë t’i bëjë bashkë partitë e vogla.

Këlliçi: Ne flasim për parti që kanë në sfond partitë e vogla që duan rrëzimin e Ramës. Unë mendoj se zoti Alimehmeti ka staturën për të dhënë më të mirën. Zonja Jorida Tabaku po ashtu.

Borakaj: Ju kë mendoni se ju përfaqëson më mirë?

Këlliçi: Nuk e them dot unë personalisht. Por po them nëse vjen çështja te emrat, ka emra sa të duash që kanë mundësinë për të mundur Ogerta Manastirliun.