Gjykata amerikane rikthen përkohësisht tarifat e Trump

Tarifat globale të Trump janë rivendosur përkohësisht, pasi Gjykata Federale e Apelit e SHBA-së miratoi kërkesën e qeverisë amerikane për të “ngrirë” përkohësisht vendimin e një gjykate më të ulët që anuloi shumicën e tarifave të vendosura nga presidenti amerikan.

Kështu, pezullimi i përkohshëm i jep administratës Trump mundësinë për të mbajtur tarifat në fuqi, ndërsa Gjykata e Apelit shqyrton argumentet ligjore të të dyja palëve.

Në thelb, vendimi i Gjykatës së Apelit të Shteteve të Bashkuara për Gjykatën Federale të Qarkut rikthen aftësinë e Trump për të vendosur tarifa duke përdorur kompetencat emergjente që ai shpalli në fillim të këtij viti. Gjykata e Apelit urdhëroi gjithashtu të dyja palët të paraqesin argumente me shkrim për çështjen e bllokimit të tarifave, të cilat do të paraqiten deri në fillim të muajit të ardhshëm.

Vendimi vjen pasi Gjykata e Tregtisë Ndërkombëtare bllokoi tarifat globale të Trump, duke thënë se presidenti kishte tejkaluar autoritetin e tij. Administrata Trump kërcënoi se do të shkonte në Gjykatën e Lartë nëse nuk do ishte në gjendje të bllokonte vendimin.

Pas vendimit të Apelit, tarifat do të mbeten në fuqi ndërsa çështja kalon nëpër gjykata.

/rtsh.al/