Gjyqtarët shqiptarë në arenën europiane

Gjyqtarët shqiptarë të futbollit vijojnë me hapa të vegjël, por të sigurt, ecjen drejt nivele të reja në arenën ndërkombëtare. Kështu, së fundi është mësuar se Komiteti i Gjyqtarëve të UEFA-s ka vendosur që gjyqtari shqiptar, Enea Jorgji, të jetë pjesë e projektit “Talent & Mentor 2022” të organizmit që qeveris futbollin kontinental për të trajnuar gjyqtarët e nivelit të kategorisë së parë. Ky është një lajm i mirë për Jorgjin, por edhe për gjyqtarët shqiptarë, pasi i jep mundësi atij që brenda pak kohe të jetë ndër emrat e gjykimit elitar në UEFA.

Në dhjetor të vitit kaluar ai hyri në histori si gjyqtari i parë shqiptar që u bë pjesë e kategorisë së parë me një vendim të Komitetit të Gjyqtarëve të UEFA-s. Kjo i jep mundësi Enea Jorgjit të jetë gjyqtar në ndeshjet e Ligës së Kampioneve, deri në ndeshjet eliminatore para grupeve, si dhe në ndeshjet e Ligës së Evropës dhe Ligës së Konferencës, duke përfshirë edhe ato në grupe, por edhe ndeshjet e ekipeve përfaqësuese të të rriturve gjatë fazave eliminatore.

Ndërkaq, lajmi tjetër i mirë është vendimi i UEFA-s për gjyqtaren Erinda Kume, e cila është përzgjedhur për të marrë pjese si anësore në fazën finale të Kampionatit Evropian të Nën-19-vjeçareve për femra, që nis të hënën në Republikën Çeke.

Është hera e parë që një gjyqtare femër nga Shqipëria merr pjesë në një event të kësaj rëndësie. Kume, e cila është e pajisur me stemën e FIFA-s, është caktuar fillimisht si gjyqtare anësore në ndeshjen Angli-Norvegji.