Goli i Ernest Muçit zgjidhet më i bukuri i muajit nëntor në Turqi

TIRANË, 15 dhjetor /ATSH/ Goli i Ernest Muçit kundër Konyaspor në javën e 14-të të Superligës turke u zgjodh goli i muajit nëntor nga faqja zyrtare e Superligës të Federatës Turke të Futbollit.

Para nisjes së takimit të së dielës Trabzonspor-Beshiktash, sekretari i përgjithshëm i Federates Turke, Sami Karaman i dorëzoi sulmuesit të Kombëtares kuqezi trofeun e golit më të bukur të muajit nëntor.

Edhe ndaj Beshiktashit (ish-skuadra e tij), Muçi u bë protagonist me lojën dhe një tjetër supergol, që e shënoi në minutën e 25-të kur rezultati ishte 0-2 në favor të miqve, duke rihapur kështu takimin. Ndeshja përfundoi në barazim 3-3 (Beshiktashi nga minuta e 38-të mbeti me 10 lojtarë).

Muçi po shënon rregullisht duke siguruar pikë të rëndësishme për skuadrën e tij, që tashmë është kthyer në pretendente për titullin kampion, duke rivalizuar me Gallatasarajin.

Muçi ka shënuar 6 gola në 4 ndeshjet e fundit, duke qenë protagonist direkt i 10 pikëve të siguruara nga Trabzonspor për të mbetur në këtë garë për titullin. Kjo është hera e parë në karrierën e Muçit që shënon në 4 ndeshje radhazi në kampionat, gjë që tregon më së miri formën e sulmuesit.

Duke qenë në kuotën e 6 golave, Muçi është vetëm një gol larg sezonit të tij më të mirë në një edicion futbollistik. Ai ka shënuar 7 gola në sezonin 2019-2020 me Tiranën në Superiore, ndërsa ka realizuar po këtë numër golash të ndarë mes Legia Vershavës dhe Beshiktashit në sezonin 2023-2024. Kësisoj, atij i duhet të gjejë vetëm 2 herë të tjera rrjetën në edicionin aktual, për të regjistruar një rekord të ri dhe me formën që po kalon, kjo arritje nuk duhet të jetë shumë larg.