Gonxhja: Shqipëria po kthehet në qendër tërheqëse për investitorët e huaj

TIRANË, 14 dhjetor /ATSH/ Ministri i Ekonomisë, Kulturës dhe Inovacionit, Blendi Gonxhja së bashku me ministren e Turizmit dhe Mjedisit, Mirela Kumbaro dhe ministren e Shtetit për Sipërmarrjen dhe Klimën e Biznesit, Delina Ibrahimaj mirëpritën një grup investitorësh të rëndësishëm nga Turqia, në një takim që vuri theksin tek mundësitë e jashtëzakonshme që vendi ynë ofron për bashkëpunim dhe zhvillim.

Gonxhja theksoi se, Shqipëria po shndërrohet në një qendër tërheqëse për investitorët e huaj falë klimës së favorshme ekonomike, politikave lehtësuese fiskale dhe pozicionit të saj strategjik në rajon.

Turizmi mbetet një shtyllë kryesore, duke ofruar hapësira të mëdha për zhvillimin e resorteve moderne, ekoturizmit dhe atraksioneve kulturore, ndërsa potenciali i sipërmarrjeve dhe inovacionit premton krijimin e një ekonomie më të qëndrueshme dhe të orientuar drejt teknologjisë, nënvizoi Gonxhja.

Ministri u shpreh se, gjatë takimit u riafirmua mbështetja për investitorët me partneritete strategjike, duke treguar se Shqipëria është vendi i duhur për ata që kërkojnë të investojnë në sektorë me rritje të shpejtë dhe potencial të madh.

1 nga 18

/a.f/