Hapet aplikimi online për menaxhimin e hapësirave të plazhit

Që prej të premtes, në sistemin online në e-Albania, është hapur aplikimi për të marrë parcela plazhi për menaxhim në sezonin turistik veror.

Lajmi u bë i ditur nga Ministrja e Turizmit dhe Mjedisit, Mirela Kumbaro, e cila thekson se sistemi do të qëndrojë i aksesueshëm për 30 ditë.

“Nga sot, hapet sistemi online në e-Albania për këdo subjekt që duke përmbushur kriteret ligjore, është i interesuar të marrë parcela plazhi në menaxhim gjatë sezonit turistik veror. Ky aplikim vlen për stacionet e plazhit që do të menaxhohen nga subjekte private, krahas plazheve publike që do të menaxhohen nga bashkitë”, thekson zonja Kumbaro.

Më parë ministrja e Turizmit dhe Mjedisit ka kërkuar që bizneset që menaxhojnë plazhet do të kujdesen edhe për rojet e plazhit.