Huduti reagon pas akuzave të Ramës: “Jam në protestë për Shqipërinë”

Ikballe Huduti ka reaguar pas deklaratave të kryeministrit Edi Rama, i cili publikoi fotografi të saj nga protesta në Tiranë dhe e lidhi praninë e saj në tubim me influenca të huaja dhe interesa të tjera politike.

Në një reagim publik, Huduti mohon se pjesëmarrja e saj në protestë ka motive përfitimi, duke theksuar se angazhimi i saj buron nga bindjet patriotike dhe qytetare.

“Dalja ime në protestë nuk ka motive përfitimi, por motive patriotike dhe qytetare. Unë jam bijë e një familjeje shqiptare dhe kam kaluar shumë sprova, padrejtësi dhe vështirësi në jetë. Pikërisht për këtë arsye nuk mund të hesht përballë padrejtësive që prekin popullin tim”, shprehet ajo.

Huduti deklaron se pjesëmarrja e saj në protestë nuk buron nga urrejtja ndaj askujt, por nga dashuria për vendin dhe bindja se qytetarët kanë të drejtë të ngrenë zërin kur mendojnë se po cenohet interesi publik.

Në reagimin e saj, ajo u bën thirrje kryeministrit, institucioneve europiane dhe udhëheqësve ndërkombëtarë që të dëgjojnë zërin e qytetarëve protestues.

“Historia ka treguar se asnjë pushtet nuk është më i fortë se vullneti i një populli të ndërgjegjësuar. Dialogu, drejtësia dhe respekti ndaj qytetarëve janë rruga më e mirë për të shmangur përçarjet dhe konfliktet”, shkruan Huduti.

Ajo thekson se ndihet përgjegjëse për fatin e Shqipërisë dhe se nuk mund të qëndrojë indiferente ndaj problemeve që prekin shoqërinë.

“Nuk kërkoj armiqësi me askënd. Kërkoj paqe me drejtësi, dialog me respekt dhe një Shqipëri më të mirë për të gjithë. As Lindje, as Perëndim – Paqe me Drejtësi për Shqipërinë”, përfundon reagimi i saj.

Deklarata e Hudutit vjen një ditë pasi kryeministri Edi Rama publikoi fotografi të saj nga protesta dhe e akuzoi se përfaqëson interesa të huaja që, sipas tij, po përpiqen të ndikojnë dhe deformojnë kauzën e protestave qytetare.