IAEA: Irani nuk po prodhon armë bërthamore, por pasurimi i uraniumit në 60% mbetet shqetësues

Drejtori i Përgjithshëm i Agjencisë Ndërkombëtare të Energjisë Atomike (IAEA), Rafael Grossi, ka sqaruar sot se aktualisht nuk ka prova për një “përpjekje sistematike në Iran për të prodhuar një armë bërthamore.” Këtë deklaratë ai e bëri për Sky News, duke hedhur dritë mbi raportet e fundit rreth programit bërthamor të Iranit.

Grossi pranoi se raporti i IAEA-së, i cili është cituar gjerësisht nga Izraeli, zbuloi se Irani po pasuron uranium në 60%, duke e bërë atë i vetmi vend në botë që kryen një veprimtari të tillë. Kjo, sipas Grossit, “kishte elementë shqetësimi”.

Megjithatë, ai shtoi: “Por të thuash se ata po ndërtojnë dhe prodhojnë një armë bërthamore, jo, ne nuk e thamë këtë.”

Këto komente vijnë në një kohë kur tensionet rajonale janë rritur ndjeshëm, me Izraelin dhe Shtetet e Bashkuara që shprehin shqetësime të thella për zhvillimet e programit bërthamor iranian. Deklarata e Grossit synon të qartësojë pozicionin e IAEA-së, duke dalluar aktivitetet e pasurimit të uraniumit nga prodhimi i drejtpërdrejtë i armëve bërthamore. ANSA

/rtsh.al/