Irani ekzekuton një sportist 19-vjeçar pas protestave

TEHERAN, 20 mars /ATSH/ – Irani ka ekzekutuar një sportist 19-vjeçar, pjesë e ekipit kombëtar, i identifikuar si Saleh Mohammadi.

Sipas mediave ndërkombëtare, Mohammadi u ekzekutua të enjten në qytetin Qom, së bashku me dy persona të tjerë, pasi u shpall fajtor për akuzën “armiqësi ndaj Zotit” (“moharebeh”), një vepër që sipas ligjit iranian dënohet me vdekje.  

Autoritetet iraniane pretendojnë se ai ishte i përfshirë në sulme ndaj forcave të sigurisë gjatë protestave të janarit, ndërsa organizatat e të drejtave të njeriut dhe familjarët e tij i kanë mohuar këto akuza, duke pretenduar se rrëfimi i tij është marrë nën presion dhe se procesi gjyqësor ka qenë i padrejtë.  

Ekzekutimi ka shkaktuar reagime dhe kritika ndërkombëtare, duke rritur shqetësimet për përdorimin e dënimit me vdekje ndaj personave të lidhur me protestat në Iran.  

Mohammadi konsiderohej një sportist premtues dhe kishte përfaqësuar Iranin në gara ndërkombëtare të mundjes.