Ishte në kërkim në Krujë, Tiranë dhe Durrës, policia e Lezhës prangos një shtetas për mashtrim

Policia e Lezhës bëri të ditur se ka prangosur një shtetas, i cili u kishte marrë para disa qytetarëve, duke i mashtruar se do t’i pajiste me tollona për blerje karburanti me çmime të favorshme, si dhe për ofrimin e shërbimeve të tjera.

Mbi 54-vjeçarin e ndaluar rëndonin 4 masa sigurie “Arrest në burg”, të caktuara nga gjykatat e Lezhës, Krujës, Tiranës dhe Durrësit, për raste të ndryshme mashtrimi, si dhe me precedent kriminal të mëparshëm për një sërë veprash të tjera penale.

“Shërbimet e Komisariatit të Policisë Lezhë, në kuadër të kontrolleve me qëllim kapjen e shtetasve të shpallur në kërkim, të akuzuar apo të dënuar për vepra të ndryshme penale, si dhe si rezultat i koordinimit të veprimeve operacionale me Policinë e Vorës dhe atë të Durrësit, në kuadër të operacionit policor të koduar “Tollonat”, kanë lokalizuar në Vorë, kapur dhe vënë në pranga shtetasin: G. P., 54 vjeç, banues në Mirditë.”- thuhet në njoftim.

Shtetasi G. P., dyshohet se gjatë periudhës kohore 2021- 2023, u ka marrë para që variojnë në vlerat nga 30.000 – 120.000 lekë të rinj, shtetasve të ndryshëm, duke i mashtruar se do t’i pajiste me tollona për blerje karburanti për furnizim mjeti me çmime të favorshme, si dhe për ofrimin e shërbimeve të tjera (karrotrec për lëvizjen e automjeteve etj.)

“Në vijim të verifikimeve në kuadër të operacionit “Tollonat”, rezultoi se 54-vjeçari është shtetas me precedent të mëparshëm kriminal për vepra penale kundër personit, në fushën e qarkullimit rrugor, në atë të organizimit të kundërligjshëm të lojërave të fatit si dhe po për veprën penale të mashtrimit. Materialet procedurale i kaluan Prokurorisë pranë Gjykatës së Rrethit Gjyqësor Lezhë, për veprime të mëtejshme.”- thuhet në njoftimin e policisë.

/rtsh.al/