KE: Nuk kemi listë për vende të sigurta, por marrëveshja Shqipëri – Itali për emigrantët, sipas ligjeve të BE

“Bashkimi Evropian nuk ka asnjë listë të përbashkët për vendet që cilësohen të sigurta”. Deklarata vjen nga zëdhënësja e komisionit të BE-së për punët e brendshme, Anitta Hipper, ndërsa u pyet për vendimin e gjykatës në Romë që detyrojë 12 azilkërkuesit të vendosur përkohësisht në Gjadër të kthehen në Itali.  Ajo tha se zyrtarët e Brukselit janë në kontakt me autoritetet italiane në lidhje me këtë vendim.

“Ne jemi të vetëdijshëm për vendimin në Itali dhe jemi në kontakt me autoritetet italiane; Për momentin nuk ka një listë evropiane të vendeve të treta të sigurta, vendet anëtare kanë lista kombëtare, por pritet që ne të punojmë për të.”, tha Hipper.

Zyrtarja e Brukselit ritheksoi se protokolli Itali-Shqipëri respekton rregullat dhe traktatet evropiane.

“Protokolli Itali-Shqipëri zbaton ligjin kombëtar italian. Por padyshim ajo zbaton gjithashtu edhe standardet e vendosura në mbrojtjen e azilkërkuesve dhe procedurat që parashikon ligji i BE-së. Ne po ashtu kemi thënë se të gjitha këto masa që autoritetet italiane po miratojnë duhet të jenë plotësisht në përputhje dhe nuk duhet në asnjë mënyrë të komprometojë zbatimin e ligjit të komunitetit dhe traktateve të BE-së”, shtoi zëdhënësja e komisionit të BE.

Ndërkohë qeveria italiane po përgatit një dekret për “shpëtimin” e marrëveshjes me Tiranën.

Kryeministrja, Xhorxhia Meloni , tha se po punon për të miratuar menjëherë një ligj të ri për të kapërcyer vendimin e gjykatës që rrezikon të bllokojë marrëveshjen me Shqipërinë.

” Qeveria është e vendosur të çmontojë këto rrjete kriminale dhe të çrrënjosë trafikimin e paligjshëm të qenieve njerëzore. Ne do të vazhdojmë të punojmë pa u lodhur për të mbrojtur kufijtë tanë dhe për të rivendosur një parim themelor: ju mund të hyni në Itali vetëm legalisht, duke ndjekur rregullat dhe procedurat e vendosura”. Shkroi ajo ne rrjetin social x.

Të premten, një gjykatë në Romë vendosi të kthejë në Itali 12 azilkërkuesit që mbaheshin në qendrën në Gjadër.