Kanabis në banesën e Bilal Hasës/ U kultivuan në dy ambiente, në kërkim edhe përgjegjësi i OSHEE

Policia e Peqinit ka dhënë informacion zyrtar lidhur me operacionin e koduar “Kurtaj”, ku u gjetën rreth 4 mijë rrënjë kanabis në magazinën e një banese, në pronësi të drejtorit të burgut të Rrogozhinës, Bilal Hasa.

Ky i fundit është shpallur në kërkim. Ndërkaq, policia ka shpallur në kërkim përgjegjëshin e OSHEE për Peqinin, i cili akuzohet për shpërdorim detyre.

Gjatë operacionit të policisë, u zbuluan 2 ambiente të një magazine të përshtatura për kultivimin e bimëve narkotike, me anë të llambave.

Në cilësinë e provës materiale, u sekuestruan rreth 4000 bimë kanabisi, llamba, neonë dhe pajisje të tjera elektrike.

Drejtoria e Përgjithshme ka ndërmarrë masa administrative të menjëhershme për pezullimin e Bilal Hasës nga detyra, deri në zbardhjen e plotë të ngjarjes nga organet kompetente./abcnews.al