Keqarsimimi, alarmi i BB: 57 për qind e 15-vjeçarëve shqiptarë janë analfabetë funksionalë
Një raport i fundit i Bankës Botërore lëshon alarmin se të rinjtë në Shqipëri po keqarsimohen duke mos arritur të përvetësojnë as aftësitë më minimale.
Raporti i cili mes të tjerash ka në fokus zhvillimet në tregun e punës ka dalë në rezultatin tronditës se 57 për qind e 15-vjeçarëve në Shqipëri janë analfabetë funksionalë, që nuk kanë aftësinë për të kuptuar dhe zbatuar njohuritë e marrë përmes leximit. E thënë ndryshe, këta janë persona që dinë të lexojnë, por nuk kuptojnë se çfarë kanë lexuar.
Rezultatet e raportit që bazohet në testet e Pizës, tregojnë se kjo është një nga normat më të larta të analfabetizmit funksional në gjithë rajonin e Europës dhe Azisë Qendrore, duke lënë pas vetëm 3 vende, Kirgistanin, Azerbajxhanin dhe Kazakistanin. Në Ballkan, Shqipëria mban rekordin negativ.
Shifrat tregojnë se arsimi në Shqipëri është i keqfinancuar në raport me vendet e tjera, të paktën në pjesën publike. Në vitin 2010, fondet e buxhetit për arsimin ndaj Prodhimit Kombëtar ishin gati dy herë më pak se mesatarja e Bashkimit Europian, ndërkohë që vitet e fundit sistemi arsimor është përballur me ndryshime të panumërta ligjore, të cilat shpesh përmbysin njëra-tjetrën.
Por përtej shkaqeve, rezultatet e raportit tregojnë se Shqipëria ka një problem jo të vogël, i cili përveç kostove të mëdha sociale dëmton edhe perspektivën e ekonomisë. Shumica e të rinjve të paarsimuar kanë më pak gjasa të gjejnë një punë dhe përveçse nuk kontribuojnë në rritjen ekonomike, shndërrohen në barrë për buxhetin e shtetit. Në kushtet e një tregu pune, gjithmonë e më shumë konkurrues dhe teknologjisë që zhvillohet me shpejtësi, kostot e keqarsimimit janë edhe më të larta.
27 prill 2013 (gazeta-Shqip.com)
Keqarsimimi, alarmi i BB: 57 për qind e 15-vjeçarëve shqiptarë janë analfabetë funksionalë burimi: Gazeta S H Q I P Gazeta SHQIP Abonohuni me Email