Këshilli i Sigurimit miraton rezolutën që kërkon “armëpushim të menjëhershëm” në Gazë

Këshilli i Sigurimit i Kombeve të Bashkuara ka miratuar një projekt-rezolutë që bën thirrje për një armëpushim të menjëhershëm midis Gazës dhe Izraelit, pasi Shtetet e Bashkuara abstenuan.

Shtetet e Bashkuara kanë vënë veton më parë për rezoluta të ngjashme. Ambasadorja e SHBA-së në Kombet e Bashkuara Linda Thomas-Greenfield tha se ndërsa rezoluta e fundit përfshin redaktime të kërkuara nga SHBA, Uashingtoni nuk mund të votonte po sepse “nuk ishte dakord me gjithçka”.

14 anëtarët e mbetur të këshillit votuan pro rezolutës, e cila u propozua nga 10 anëtarët e zgjedhur të organit .

Uashingtoni kishte refuzuar për muaj të tërë të pranonte termin ” armëpushim” dhe kishte përdorur të drejtën e vetos për të mbrojtur Izraelin.

Por mes presionit global në rritje për një armëpushim në luftën që ka vrarë më shumë se 32,000 palestinezë , SHBA abstenuan nga votimi të hënën për të lejuar Këshillin e Sigurimit të kërkojë një armëpushim të menjëhershëm për muajin e Ramazanit , i cili skadon pas dy javësh.

Rezoluta e Këshillit të Sigurimit nënvizon “nevojën urgjente për të zgjeruar rrjedhën e ndihmave humanitare dhe për të forcuar mbrojtjen e civilëve në të gjithë Rripin e Gazës” dhe përsërit thirrjen e saj për “heqjen e të gjitha pengesave për dërgimin e ndihmës humanitare”.

Radioja ushtarake e Izraelit transmetoi pak para fillimit të takimit të Këshillit se kryeministri izraelit Benjamin Netanyahu do të anulonte misionin e planifikuar në Uashington nëse SHBA nuk do të vinte veton ndaj rezolutës.

SHBA-ja ka vënë veton ndaj tre projekt -rezolutave të Këshillit për luftën në Gaza.

Ata gjithashtu kanë abstenuar dy herë, duke lejuar Këshillin të miratojë rezoluta që synojnë rritjen e ndihmës për Gazën dhe duke bërë thirrje për pauza të zgjatura në luftime.

Rusia dhe Kina gjithashtu kanë vënë veton ndaj dy projekt-rezolutave të SHBA – tetorin e kaluar dhe të premten e kaluar .

/rtsh.al/