Kokaina në Durrës/ Policia: Shpallet në kërkim presidenti i “Banaking”. Në pranga administratori dhe punonjësit e skanerit (Emrat)

Tre persona u arrestuan nga policia për kokainën e kapur në portin e Durrësit.

Në pranga përfunduan 57-vjeçari Petrit Demishaj, administrator i kompanisë “BanaKing” si dhe dy punonjësit e skanerit Alban Naziraj, 48 vjeç e Artur Sevdaraj i po të njëjtës moshë. Ata akuzohen për veprat penale “Trafikimi i lëndëve narkotike” dhe “Falsifikim kompjuterik”.

Po ashtu, u shpall në kërkim edhe presidenti i kompanisë pritëse të ngarkesës me banane, 53-vjeçari Trifon Murataj.

Nga hetimet e deritanishme, agjentët dyshojnë se katër të akuzuarit, në bashkëpunim me njëri-tjetrin, kanë organizuar trafikimin e 33.5 kg kokainë, nga Ekuadori në drejtim të Portit të Durrësit.

Droga u zbulua si rezultat i kontrollit të kontenierit me qen antidrogë. Kjo pasi nga kontrolli me skaner nuk u konstatua prezencë lënde narkotike ndonëse hetuesit kishin informacione për kokainën.

Lënda narkotike u gjet në dy arka me banane. Ajo ishte ndarë në 31 pako, të cilat ishin mbështjellë me natriban.

Ndërkohë, pritet të kontrollohen dhe 84 kontenierë të tjerë, të cilët kanë mbërritur në port po nga Ekuadori. Ngarkesa sipas burimeve, mësohet se ishte ndalur në Portin e Maltës e më pas mbërriti në Durrës.

Kjo është hera e dytë që në ngarkesat e porositura nga kompania “BanaKing” kapet drogë.

Port, Durrës – Vijon operacioni policor i koduar “Again”, për goditjen e veprimtarisë kriminale në fushën e trafikimit të drogave të forta.

Operacioni u zhvillua nga strukturat e Hetimit të Krimit të Drejtorisë Vendore të Policisë Durrës, në bashkëpunim me Policinë Kufitare në Port Durrës, në koordinim me Departamentin e Policisë Kriminale, në Policinë e Shtetit.

Vihet në pranga administratori i kompanisë që priste ngarkesën me banane, brenda së cilës Policia gjeti 33.5 kilogramë kokainë.

Shpallet në kërkim presidenti i kësaj kompanie.

Në pranga edhe 2 punonjës të skanerit, në Portin e Durrësit.

Në vijim të veprimeve të thelluara hetimore, të kryera nga strukturat e Hetimit të Krimit të Drejtorisë Vendore të Policisë Durrës, për zbardhjen e rastit të trafikimit të 33.5 kilogramë lëndë të dyshuar narkotike kokainë, që u gjetën dhe u sekuestruan nga Policia, gjatë operacionit policor të koduar “Again”, u bë arrestimi në flagrancë i shtetasve:

P. D., 57 vjeç, banues në Tiranë, me detyrë administrator i kompanisë që kishte porositur ngarkesën me banane, për veprën penale “Trafikimi i lëndëve narkotike”;

A. N., 48 vjeç, banes në Tiranë, me detyrë operator skaneri, në Portin e Durrësit, për veprat penale “Trafikimi i lëndëve narkotike” dhe “Falsfikimi kompjuterik”;

A. S., 48 vjeç, banues në Tiranë, me detyrë imazhier skaneri, në Portin e Durrësit, për veprat penale “Trafikimi i lëndëve narkotike” dhe “Flasifikimi kompjuterik”.

Gjithashtu u shpall në kërkim shtetasi T. M., 53 vjeç, banues në Tranë, president i kompanisë pritëse të ngarkesës me banane. Vijon intensivisht puna për kapjen e tij.

Arrestimi i 3 shtetasve dhe shpallja në kërkim e presidentit të kompanisë, u bënë në kuadër të operacionit policor të koduar “Again”, gjatë të cilit, shërbimet e Policisë, bazuar në inteligjencën informative që dispononte Policia e Shtetit, se në një kontenier me ngarkesë bananesh, për llogari të një kompanie në Tiranë, kishte lëndë narkotike, ushtruan kontroll të imtësishëm me qen antidrogë, pavarësisht se skaneri e nxorri të pastër ngarkesën me banane.

Nga hetimet dyshohet se këta shtetas, në bashkëpunim me njëri-tjetrin, kanë organizuar trafikimin e 33.5 kg kokainë, nga Ekuadori në drejtim të Portit të Durrësit.

Nën drejtimin e Prokurorisë pranë Gjykatës së Rrethit Gjyqësor Durrës, strukturat hetimore të DVP Durrës vijojnë punën për identifikimin dhe kapjen e personave të tjerë të implikuar në këtë veprimtari kriminale.