Kosova, përmirësim në renditjen e perceptimit të korrupsionit

PRISHTINË, 11 shkurt/ATSH/ Kosova ka bërë një përmirësim të ndjeshëm në renditjen e Indeksit të Perceptimit të Korrupsionit të publikuar nga Transparency International.

Sipas raportit, Kosova ka arritur një total prej 44 pikësh, ose me një ndryshim prej 3 vende më lart, krahasuar me vitin e kaluar.

Sipas këtij rezultati, Kosova renditet në vendin e 73-të nga 180 vende.

Indeksi i Perceptimit të Korrupsionit mat perceptimin e korrupsionit të sektorit publik, sipas ekspertëve dhe biznesmenëve. Rezultati i çdo vendi është një kombinim i të paktën 3 burimeve të të dhënave të nxjerra nga 13 sondazhe dhe vlerësime të ndryshme.

Në raport theksohet se qasja gjysmake e Malit të Zi (46) ndaj reformave ka lënë të pazgjidhur kapjen e gjyqësorit, gjë që rrezikon të minojë përparimin e bërë nga Prokuroria e Posaçme e Shtetit dhe të vazhdojë pandëshkueshmërinë për zyrtarët e lartë.

Maqedonia e Veriut ka një rezultat prej 40 këtë vit, me një ndryshim prej -2 nga viti i kaluar, që do të thotë se renditet në vendin e 88-të nga 180 vende.

Duke vlerësuar 180 vende në mbarë botën, Indeksi i Perceptimit të Korrupsionit është treguesi kryesor global i korrupsionit në sektorin publik. /KosovaPress/