Kryeministri Rama publikon pamjet nga Lungomare 4: Një tjetër transformim shembullor në Radhimë

Kryeministri Edi Rama ka ndarë mbrëmjen e sotme në rrjetet e tij sociale zyrtare pamje nga ecuria e punimeve në projektin “Lungomare 4” në zonën e Radhimës, duke e cilësuar këtë ndërhyrje si një tjetër pikë kthese në transformimin e vijës bregdetare të Vlorës.

Përmes një videoje ilustruese që pasqyron ecurinë e projektit dhe ndryshimet infrastrukturore përgjatë këtij segmenti, kreu i qeverisë theksoi se investimi po i jep një dimension krejt të ri turistik kësaj zone mjaft të frekuentuar të jugut.

“VLORË – Lungomare 4, Radhimë, aty ku po merr jetë një tjetër transformim shembullor”, shkroi Kryeministri Rama në postimin e tij.

Projekti i “Lungomare 4” synon të vijojë linearitetin e shëtitoreve bregdetare të Vlorës, duke integruar hapësira publike për këmbësorët, elemente të gjelbërimit urban dhe infrastrukturë mbështetëse për operatorët turistikë në zonën e Radhimës, çka pritet të rrisë cilësinë e ofertës turistike në këtë Qark.

/rtsh.al/