Kryeministri hungarez Viktor Orban bën një vizitë befasuese në Kinë pas udhëtimit në Rusi

Kryeministri hungarez Viktor Orbán ka bërë një vizitë të papritur në Kinë, pas udhëtimeve të tij në Ukrainë dhe Rusi për të diskutuar një zgjidhje paqeje për Ukrainën.

Duke zbritur nga avioni, Orbán u përshëndet nga zëvendësministri kinez i Punëve të Jashtme Hua Chunying dhe zyrtarë të tjerë.

Vetëm dy muaj më parë, Orban ishte takuar me Xi kur e priti liderin kinez në Budapest, si pjesë e një turneu evropian në tre vende, që përfshinte ndalesa në Francë dhe Serbi, e cila nuk është anëtare e Bashkimit Europian apo e NATO-s.

Më vonë ai postoi një foto me presidentin kinez Xi Jinping, me të cilën shkruante: “Përveç Rusisë dhe Ukrainës, fundi i luftës varet nga vendimi i tre fuqive botërore, Shteteve të Bashkuara, Bashkimit Evropian dhe Kinës”.

Ndryshe nga shumica e liderëve të tjerë në BE, kryeministri hungarez shihet gjerësisht se ka një marrëdhënie të ngushtë me Vladimir Putin. Ai në mënyrë rutinore ka bllokuar, vonuar ose zbutur përpjekjet e BE-së për të ndihmuar Kievin dhe për të vendosur sanksione ndaj Moskës për veprimet e saj në Ukrainë.

Vizita e tij në Moskë shkaktoi dënime nga Ukraina dhe liderë të tjerë evropianë, por Orbán e justifikoi udhëtimin si një përpjekje kontaktuese.

“Numri i vendeve që mund të bisedojnë me të dyja palët ndërluftuese është në rënie,” tha ai. “Hungaria po bëhet ngadalë i vetmi vend në Evropë që mund të flasë me të gjithë.”

Edhe pse Orbán ka argumentuar prej kohësh për përfundimin e armiqësive në Ukrainë, ai nuk ka përshkruar se çfarë mund të nënkuptojë kjo për integritetin territorial të vendit ose sigurinë e ardhshme.

Forcimi i lidhjeve me Kinën

Dy muaj më parë, Xi bëri një udhëtim të ngjashëm në Budapest si pjesë e turneut evropian të presidentit kinez në tre vende, i cili përfshinte edhe ndalesa në Francë dhe Serbi.

Hungaria dhe Kina nënshkruan një sërë marrëveshjesh të reja gjatë këtyre bisedimeve për të thelluar bashkëpunimin e tyre ekonomik dhe kulturor.

Pekini ka investuar miliarda në Hungari dhe e sheh anëtarin e Bashkimit Evropian si një pikëmbështetje të rëndësishme brenda bllokut 27 anëtarësh.

Në dhjetor, Hungaria njoftoi se një nga prodhuesit më të mëdhenj në botë të automjeteve elektrike, BYD e Kinës, do të hapë fabrikën e saj të parë evropiane të prodhimit në jug të vendit – një ndërhyrje që mund të prishë konkurrencën e industrisë së prodhimit të makinave të kontinentit.

Nën drejtimin e Orbanit, Hungaria i ka thelluar lidhjet politike e ato ekonomike me Pekinin, dhe në dhjetor njoftoi se gjiganti kinez i prodhimit të makinave të tilla BYD, do të hapë fabrikën e tij të parë europiane të prodhimit të këtyre makinave në jug të vendit. E kjo në një kohë kur BE-ja njoftoi se do të vendosë tarifa ndaj automjeteve elektrike të importuara nga Kina, pas një hetimi që zbuloi se automjetet elektrike që prodhohen në Kinë mbështeten nga subvencionimeve të padrejta financiare, që përbëjnë kërcënim për prodhuesit europianë dhe dëmtojnë tregun europian për automjetet elektrike.

/rtsh.al/