Lamberto Zannier largohet së shpejti nga Kosova

Shefi i UNMIK-ut Lamberto Zannier do të largohet së shpejti nga Kosova. Lajmi bëhet i ditur nga mediat kosovare sipas të cilave Zanier është në listën për sekretar të përgjithshëm të Organizatës për Siguri dhe Bashkëpunim Evropian (OSBE) dhe i ka të gjitha gjasat që të fitojë garën.
Numri një i misionit ndërkombëtar funksional vetëm në very Zannier, i cili ka ardhur në Kosovë pas shpalljes së pavarësisë, e ka konfirmuar për gazetën Zëri mundësinë e largimit të tij nga UNMIK-u.
Ai ka pohuar se është në garën për postin e sekretarit të përgjithshëm të OSBE-së por ende nuk e ka fituar këtë garë.
“Procedurat janë duke vazhduar dhe pritet një propozim formal nga OSBE”, ka thënë Zannier, duke shtuar se brenda pak ditësh pritet të dihet edhe emri i fituesit.
Zannier aktualisht gjendet në Bruksel, ndërsa duket se nuk është shqetësuar fare nëse do ta braktisë punën në UNMIK, respektivisht në Kosovë.

“Të gjithë përfaqësuesit e huaj njëherë duhet të largohen nga Kosova. Edhe unë duhet të largohem, tani apo një herë tjetër. Por, këtë do ta mësojmë javën tjetër”, ka thënë Zannier.

Diplomati italian, i cili mandatin e tij në UNMIK e ka nisur më 13 qershor të vitit 2008, thotë se për periudhën trevjeçare kanë mbetur probleme të pazgjidhura në Kosovë, edhe pse për disa çështje, sipas tij, ka pasur progres.