Legalizimet, 50% e faturës paguhet me bono. Afati deri në dhjetor të 2027-s për vlefshmërinë e letrave me vlerë. Ja kush përfiton

Përdorimi i bonove të privatizimit redukton barrën financiare që kanë në ngarkim qytetarët për të paguar truallin, për efekt të procesit legalizues.

Nisma ligjore, e miratuar së fundmi zhvendos me më shumë se dy vite vlefshmërinë e bonove. Në këtë mënyrë, qytetarët që kanë letra me vlerë, mund t’i përdorin ato për procesin legalizues dhe privatizimet deri në fund të muajit dhjetor të 2027-s.

Në ndryshimet e bëra, në 2014-n në ligjin për legalizimin e objekteve pa leje u përcaktua, që qytetarët të cilët kishin ndërtuar në tokë shtet apo tokë me pronarë, gjysmën e faturës për truallin ta paguanin me letra me vlerë. Kjo ka krijuar një tjetër lehtësi për familjet që janë në proces legalizimi, pasi ul me 20% të tjera shumën e faturuar për parcelën ndërtimore.

Por bonot e privatizimit, nuk përdoren vetëm në procesin e legalizimit të ndërtimeve informale. Ato përdoren gjithashtu për procesin e privatizimit të sipërmarrjeve të mesme dhe të vogla për pjesën e aksionerëve që zotërojnë truallin dhe gëzojnë të drejtën e parablerjes për objektin e ndërtuar në tokën e tyre dhe në objekte të tjera shtetërore, që janë në proces privatizimi.